محمود عباس یورپی یونین سے فلسطینی ریاست کو تسلیم کرنے کا مطالبہ کریں گے۔فلسطینی وزیر خارجہ

برسلز(اردوپوائنٹ اخبارتازہ ترین-انٹرنیشنل پریس ایجنسی۔22 جنوری۔2018ء) فلسطین کے وزیر خارجہ ریاض المالکی نے کہا ہے کہ صدر محمود عباس یورپی یونین سے فلسطینی ریاست کو تسلیم کرنے کا مطالبہ کریں گے۔فلسطینی وزیر خارجہ نے غیر ملکی غیرملکی نشریاتی ادارے سے بات چیت میں بتایا کہ محمود عباس آج برسلز میں یورپی یونین کے سربراہ فیڈریکا موگرینی کے علاوہ یورپی یونین سے تعلق رکھنے والے 28 وزرائے خارجہ سے ملاقات کریں گے ،ملاقات کے دوران وہ اس بات پر زور دیں گے کہ فلسطین کو بطور ریاست تسلیم کیا جائے۔

(جاری ہے)

انہوں نے کہا کہ یورپی یونین سے اس بات پر بھی زور دیا جائے گا کہ ٹرمپ کی جانب سے مقبوضہ بیت المقدس کو اسرائیلی دارالحکومت قرار دیے جانے کے اعلان کے جواب میں فلسطینی ریاست کو تسلیم کیا جانا اس کا ردعمل ہوسکتا ہے۔دوسری جانب برسلز میں سفارتی ذرائع کا کہنا ہے کہ آج ہونے والی ملاقات میں اس بات کا کوئی امکان نہیں کہ یورپی یونین فلسطین کو بطور ریاست تسلیم کرلے تاہم یورپی یونین نے اس حوالے سے فیصلے کو تمام رکن ممالک کی اپنی صوابدید پر چھوڑ دیا ہے اور آج ہونے والی ملاقات میں محمود عباس زیادہ سے زیادہ ان کی حمایت حاصل کرنے کی امید ہی کرسکتے ہیں۔