ڈیموکریٹس اراکین سینٹ نے ٹرمپ کو پالیسیوں کو امریکا مخالف قراردیدیا‘امریکا تنہائی کا شکار ہورہا ہے-ڈیموکریٹس

واشنگٹن(اردوپوائنٹ اخبارتازہ ترین-انٹرنیشنل پریس ایجنسی۔22 جنوری۔2018ء) امریکا کے ایوان بالا میں اپوزیشن جماعت ڈیموکریٹس نے 45 ویں امریکی صدر ڈونلڈ ٹرمپ کی خارجہ پالیسیوں کو خطرناک ‘لاپرواہ اور امریکا مخالف قرار دیتے ہوئے خدشے کا اظہار کیا ہے کہ امریکا ان پالیسیوں سے عالمی تنہائی کا شکار ہوسکتا ہے۔ ڈیموکریٹس نے سینیٹ کی وزارت خارجہ کمیٹی کو پیش کرنے کے لیے دستاویزات تیار کی ہیں جس میں ٹرمپ کی خارجہ پالیسیوں سے متعلق نقائص نشاندہی کی گئی ہے۔

امریکی نشریاتی ادارے کے مطابق دستاویزات سے متعلق سینیٹر بین گارڈین نے کہا کہ ڈونلڈ ٹرمپ سوشل میڈیا ٹوئٹر کے ذریعے خارجہ پالیسی کا اعلان کررہے ہیں جبکہ ٹرمپ کے خارجہ پالیسی سے متعلق فیصلے جلد بازی پر مبنی ہوتے ہیں اور بیشتر فیصلوں میں ان کے اپنے سیکرٹری آف اسٹیٹ ریکس ٹلرسن کی مشاورت بھی شامل نہیں ہوتی۔

(جاری ہے)

سینیٹر بین گارڈین نے ڈونلڈ ٹرمپ کو قومی سلامتی کے لیے خطرہ قرار دیتے ہوئے کہا کہ ہماری قوم اور آزاد دنیا کی تاریخ میں ٹرمپ ایک غیر متوقع حکمران ہیں۔

دستاویزات میں صدر ڈونلڈ ٹرمپ کو خبردار کیا گیا ہے کہ اہم نوعیت کے سفارتی امور کو ٹوئٹر پر طے نہیں کیا جا سکتا۔ ڈیموکریٹس کی جانب سے تیار کردہ دستاویزات میں کہا گیا کہ ‘ٹرمپ انتظامیہ ہر مسئلے، حالات اور واقعات پر ہتھوڑے برسانا شروع کردیتی ہے اور اعتراضات کی بازگشت اسلام آباد میں بھی سنی جارہی ہیں۔کمیٹی کے ڈیموکریٹ سٹاف نے دعویٰ کیا کہ سیکرٹری آف اسٹیٹ ٹلرسن نے خود اقرار کیا ہے کہ انہیں امریکا کی خارجہ پالیسی سے متعلق فیصلوں کے بارے اس وقت معلوم ہوتا ہے جب صدر کا سوشل میڈیا سٹاف ان کے کہنے پر ٹوئیٹ کرتا ہے۔

ریکس ٹلرسن نے یہ بھی کہا کہ امریکی اقدار میں امریکی مفاد کی جھلک نہیں رہی ہے۔امریکا میں مسلم ممالک پر سفری پابندیوں سے متعلق ٹرمپ کے فیصلے پر سٹاف نے لکھا کہ مسلم ممالک پر سفری پابندیوں کا فیصلہ بطور ثبوت پیش کیا جا سکتا ہے کہ ٹرمپ انتظامیہ ہمیں دنیا سے کاٹ کر ہماری اقدار کی توہین کررہی ہے۔ڈیموکریٹس نے دعوی کیا کہ صدر نے متعدد مرتبہ ٹوئٹر پر جنگ کی دھمکی اور جنسی لعن طعن کر کے اپنے آفیس کی تذلیل کی ہے جس سے ظاہر ہوتا ہے کہ وہ حکومت چلانے کے اصولوں سے بے خبر ہیں۔

انہوں نے مزید لکھا کہ محض ٹرمپ کی وجہ سے امریکا کا اعتماد دیگر ممالک میں تنزلی کا شکار ہے اور ڈونلڈ ٹرمپ نے امریکی اقدار سے بغاوت کی، اتحادیوں کو تنہا چھوڑ دیا اور دشمنوں سے جا ملے ہیں۔ اس میں مزید کہا گیا کہ ٹرمپ انتظامیہ کی خارجہ پالیسی کا نعرہ سب سے پہلے امریکا خطرناک اور تباہ کن ہوگا جس کا نتیجہ امریکا تنہا اور امریکا کے آخری ہونے کی صورت میں سامنے آئے گا۔

ڈیموکریٹس نے دعویٰ کیا کہ ٹرمپ کے جملے اور ان کی حرکات و سکنات سے روس کے صدر ولادی میر پیوٹن کی جانب اشارے ملتے ہیں جو امریکا کے جمہوری اداروں اور اقدار پر حملہ جاری رکھیں گے۔گیلپ پول کی جانب سے 134 ممالک میں امریکا سے متعلق اعتماد پر سروے کے نتائج کا ذکر کرتے ہوئے انہوں نے کہا کہ دنیا کا امریکا پر اعتماد کی شرح صرف 30 فیصد سامنے آئی جبکہ سابق صدر اوباما کے دور میں اعتماد کا گراف 48 فیصد تھا۔

ڈیموکریٹس نے الزام عائد کیا کہ ٹرمپ انتظامیہ اپنے اتحادیوں مثلاً نیٹو، اقوام متحدہ، برطانیہ، آسٹریلیا اور جنوبی کوریا سے کیے گئے اہم نوعیت کے وعدوںسے منحرف نظر آتی ہے۔ دستاویزات میں دعویٰ کیا گیا کہ ٹرمپ انتظامیہ کی جانب سے جاری اعلامیے سے امریکا، چین کے ساتھ تصادم کے دھانے پر کھڑا ہے اور ایران کے ساتھ معاہدے کی شرائط کو تسلیم نہ کرکے جوہری معاہدے کو نقصان پہنچا رہا ہے جبکہ ٹرمپ نے اپنے موقف کے حق میں ایران کے خلاف کوئی ٹھوس ثبوت بھی پیش نہیں کیے۔

صدر ڈونلڈ ٹرمپ قومی سلامتی کے معاملے میں ناکام ہو چکا ہے اور ترقیاتی اداروں اور امریکی سفارتی تعلقات کو ختم کر رہے ہیں۔سینیٹ نے سٹیٹ ڈیپارٹمنٹ اور یو ایس ایڈ میں کل 163 ملازمتیوں کی تصدیق کی تھی تاہم ٹرمپ انتظامیہ تاحال 72 ملازمتوں پر امیدواروں کو منتخب نہیں کر سکی۔ڈیموکریٹس نے الزام عائد کیا کہ صدر ڈونلڈ ٹرمپ اور ان کے اہلخانہ امریکی مفاد کے برعکس ذاتی کاروبار کی تشہیر میں مصروف ہیں اور ان کے بیٹی اور مشیر ایوانکا ٹرمپ کچھ ایسے امور پر کام کررہی ہیں جن سے انہیں مالی فوائد پہنچ سکیں۔