عمران خان پارلیمنٹ اور پارلیمنٹرینز کی توہین کر نے پر معافی مانگیں ،ْ عابد شیر علی

اتوار 21 جنوری 2018 20:51

اسلام آباد (اُردو پوائنٹ اخبارتازہ ترین - این این آئی۔ 21 جنوری2018ء) وزیر مملکت برائے توانائی عابد شیر علی نے کہا ہے کہ عمران خان پارلیمنٹ اور پارلیمنٹرینز کی توہین کر نے پر معافی مانگیں ۔ ایک انٹرویومیں انہوں نے کہا کہ پی ٹی آئی کے سربراہ عمران خان ملکی پارلیمنٹ کی مسلسل توہین کر رہے ہیں تاہم پی ٹی آئی کے اراکین پارلیمنٹ باقاعدگی سے اپنی تنخواہیں بھی وصول کر رہے ہیں۔

انہوں نے کہا کہ پی ٹی آئی کے اراکین پارلیمنٹ میں اگر عزت اور وقار ہے تو انہیں اپنی یہ تنخواہیں بھی واپس کر دینی چاہئیں۔

(جاری ہے)

وزیر مملکت نے کہا کہ شیخ رشید احمد نے قومی اسمبلی سے استعفیٰ نہیں دیا اور نہ ہی وہ کبھی ایسا کریں گے کیونکہ وہ ایک چالاک آدمی ہے جس کی عوام میں کوئی مقبولیت نہیں۔ ایک سوال کے جواب میں انہوں نے کہا کہ ملک کے لوگوں کا اپنے محبوب قائد محمد نواز شریف سے بہت گہرا تعلق اور لگائو ہے، چکوال کے ضمنی انتخاب کے نتائج اس بات کا واضح ثبوت ہیں کہ محمد نواز شریف آج بھی عوام کی مکمل حمایت سے لطف اندوز ہو رہے ہیں۔ عابد شیر علی نے کہا کہ لوگ پی ٹی آئی کی سیاست سے بخوبی آگاہ ہیں اور وہ انہیں خیبرپختونخواہ میں منتخب کر کے مایوس ہوچکے ہیں۔