دینہ میں8سالہ بچی کے ساتھ ریپ کرنے کے الزام میں ایک شخص گرفتار

بچی کی ابتدائی میڈیکل رپورٹ میں زیادتی کی تصدیق ہوگئی ،ْملزم بچی کا رشتہ دار نکلا

ہفتہ 20 جنوری 2018 12:31

دینہ میں8سالہ بچی کے ساتھ ریپ کرنے کے الزام میں ایک شخص گرفتار
دینہ (اُردو پوائنٹ اخبارتازہ ترین - این این آئی۔ 20 جنوری2018ء)جہلم کی تحصیل دینہ میں8سالہ بچی کے ساتھ ریپ کرنے کے الزام میں ایک شخص کو گرفتار کرلیا گیا جبکہ بچی کی ابتدائی میڈیکل رپورٹ میں زیادتی کی تصدیق ہوگئی۔پولیس کے مطابق گرفتار ملزم اسحق کی عمر 26سال ہے اور وہ بچی کا قریبی رشتہ دار ہے ،ْجو بچی کو ورغلا کر اپنے ساتھ لے گیا تھا اور اسے ریپ کا نشانہ بنایا۔

(جاری ہے)

متاثرہ لڑکی کے والد نے بتایا کہ جب بچی اپنی والدہ کے ساتھ گھر میں تھی تو ملزم آیا اور بہلا کر بچی کو اپنے ساتھ لے گیا اور قریبی مقام پر اسے زیادتی کا نشانہ بنایا اور نیم بے ہوشی کے حالت میں چھوڑ کر فرار ہوگیا۔انہوں نے کہا کہ اس واقعہ کے فوری بعد بچی کے والد کی جانب سے تھانہ دینہ میں ایف آئی آر درج کرائی گئی تھی۔ایف آئی آر درج ہونے پر ڈی پی او جہلم عبدالغفار قیصرانی کی خصوصی ہدایت پر کارروائی کی گئی اور مفرور ملزم کو گرفتار کرلیا گیا۔بعد ازاں متاثرہ بچی کا میڈیکل کرایا گیا، جس کی ابتدائی رپورٹ میں بچی سے جنسی زیادتی کی تصدیق ہوگئی ہے تاہم پولیس نے ملزم کے ڈی این اے ٹیسٹ کے لیے نمونے بھی بھیج دیئے ہیں، جن کی رپورٹس کا انتظار ہے۔