قومی اسمبلی، سیاسی جماعتوں کے عمران خان اور شیخ رشید احمد کی طرف سے پارلیمنٹ کے تقدس کو مجروح کرنے کے بیان پر شدید ردعمل پر پی ٹی آئی کے ارکان کو شرمندگی کا سامنا

اسلام آباد ۔ (اُردو پوائنٹ اخبارتازہ ترین - اے پی پی۔ 18 جنوری2018ء) قومی اسمبلی میں تمام سیاسی جماعتوں کی طرف سے پی ٹی آئی کے چیئرمین عمران خان اور عوامی مسلم لیگ کے سربراہ شیخ رشید احمد کی طرف سے پارلیمنٹ کے تقدس کو مجروح کرنے کے بیان پر شدید ردعمل کے اظہار کے موقع پر ایوان میں موجود پی ٹی آئی کے ارکان کو شرمندگی کا سامنا کرنا پڑا۔ جمعرات کو قومی اسمبلی کے اجلاس میں پاکستان پیپلز پارٹی کے چیف وہپ اعجاز جاکھرانی، وزیر خارجہ خواجہ محمد آصف، قائد حزب اختلاف سیّد خورشید احمد شاہ، عوامی نیشنل پارٹی کے حاجی غلام احمد بلور، مسلم لیگ (ضیائ) کے سربراہ محمد اعجاز الحق، ایم کیو ایم کے شیخ صلاح الدین، ساجد احمد، مسلم لیگ (ن) کے رکن میاں جاوید لطیف سمیت دیگر ارکان نے گذشتہ شب لاہور کے احتجاجی جلسہ میں عمران خان اور شیخ رشید احمد کی جانب سے پارلیمنٹ کے تقدس کو مجروح کرنے کے حوالہ سے بیان پر شدید ردعمل کا اظہار کیا تو اس پر پی ٹی آئی کے ارکان امجد علی خان اور ڈاکٹر اظہر جدون سمیت دیگر ارکان ایوان میں انتہائی شرمندہ شرمندہ نظر آئے۔

(جاری ہے)

واضح رہے کہ پاکستان تحریک انصاف کی صف اول کی قیادت اور ارکان قومی اسمبلی نے جمعرات کو قومی اسمبلی کے اجلاس میں شرکت نہیں کی۔ قرائن سے پتہ چلتا ہے کہ انہوں نے قومی اسمبلی کے اجلاس میں اس لئے شرکت نہیں کی کیونکہ انہیں عمران خان اور شیخ رشید احمد کے پارلیمنٹ کے حوالہ سے لاہور جلسہ میں بیان میں شدید ردعمل کا اندیشہ تھا۔