غیر قانونی تعمیرات کیس،

بلڈوزر لے کر غیرقانونی تعمیرات گرا ڈالیں، چیف جسٹس کا ڈپٹی کمشنر مری کو حکم سماعت کل پھر ہو گی سیاسی اثرورسوخ کی وجہ سے غیرقانونی تعمیرات ہم سے چھپائی نہ جائے،جن کے دور میں مری میں غیر قانونی تعمیرات ہوئی ان کے ناموں کی فہرست فراہم کی جائے،چیف جسٹس ثاقب نثار کے ریمارکس

پیر 15 جنوری 2018 12:43

غیر قانونی تعمیرات کیس،
اسلام آباد(اُردو پوائنٹ اخبارتازہ ترین - آئی این پی۔ 15 جنوری2018ء) چیف جسٹس آف پاکستان جسٹس ثاقب نثار نے مری میں غیر قانونی تعمیرات سے متعلق کیس کی سماعت کرتے ہوئے ڈپٹی کمشنر مری کو حکم دیا ہے کہ بلڈوزر کرائے پر لیں اور غیر قانونی تعمیرات گرائیں،جن کے دور میں مری میں غیر قانونی تعمیرات ہوئی ان کے ناموں کی فہرست فراہم کی جائے، کیس کی سماعت (آج) منگل کو پھر ہو گی ۔

پیر کو سپریم کورٹ میں چیف جسٹس پاکستان جسٹس ثاقب نثار کی سربراہی میں 3 رکنی بینچ نے غیر قانونی تعمیرات سے متعلق کیس کی سماعت کی۔ چیف جسٹس نے ڈپٹی کمشنر مری سے مکالمے کے دوران ریمارکس دیئے کہ میں نے مال روڈ جوانی میں بھی دیکھا ہے اور بڑھاپے میں بھی، غیر قانونی تعمیرات کس کی ہیں، جن کے دور میں یہ تعمیرات ہوئی ان کے ناموں کی فہرست بھی فراہم کریں، مری جائیں منادی کروادیں جسے آنا ہے عدالت آجائے، عدالتوں میں جو کیس ہیں ان کی تفصیلات بھی فراہم کریں۔

(جاری ہے)

انہوں نے کہا سیاسی اثرورسوخ کی وجہ سے غیرقانونی تعمیرات ہم سے چھپائی نہ جائے، یہ کوئی راکٹ سائنس نہیں ہے، یہ غیرقانونی تعمیرات آپ کے ادارے کی آشیرباد سے ہوئیں، ثابت کریں کہ ملک میں قانون کی حکمرانی ہے۔ بلڈوزر کرائے پر لیں اور تعمیرات گرائیں، یہ عمارتیں گریں گی یا آپ گر جائیں گے، بعد ازاں کیس کی مزید سماعت منگل تک ملتوی کردی گئی۔