سرفراز احمد نے نیوزی لینڈ کے ہاتھوں تیسرے ون ڈے میں شکست کا ذمہ دار بیٹنگ کو قرار دیدیا

بلے بازوں کی پرفارمنس سے سخت مایوسی ہوئی ، سیریز ہار چکے اب اگلے 2 میچز جیتنے کی حکمت عملی تیار کریں گے،سرفراز

ہفتہ 13 جنوری 2018 18:09

سرفراز احمد نے نیوزی لینڈ کے ہاتھوں تیسرے ون ڈے میں شکست کا ذمہ دار ..
ڈونیڈن(اُردو پوائنٹ اخبارتازہ ترین - آن لائن۔ 13 جنوری2018ء)قومی کرکٹ ٹیم کے کپتان سرفراز احمد کا کہنا ہے کہ انہیں بلے بازوں کی پرفارمنس سے سخت مایوسی ہوئی ، سیریز ہار چکے اب اگلے 2 میچز جیتنے کی حکمت عملی تیار کریں گے۔میچ میں عبرتناک شکست کے بعد گفتگو کرتے ہوئے کپتان سرفراز احمد سخت افسردہ نظر آئے، ان سے میچ میں شکست کے حوالے سے سوال کیا گیا تو انہوں نے انتہائی غمزدہ انداز میں بلے بازوں کو شکستِ فاش کا ذمہ دار قرار دیا۔

(جاری ہے)

کپتان سرفراز احمد نے کہا کہ قومی ٹیم کے بلے بازوں کی پرفارمنس نے انہیں سخت مایوس کیا ہے، بالرز نے اپنے حصے کا کام کردیا لیکن بلے باز متاثر کرنے میں ناکام رہے۔سرفراز احمد نے مزید کہا کہ سیریز تو ہار ہی چکے ہیں ، اب مل کر بیٹھیں گے اور جو بھی مسائل ہوں گے انہیں حل کرکے اگلے 2 میچز میں فتح حاصل کرنے کی کوشش کریں گے۔واضح رہے کہ قومی کرکٹ ٹیم نے نیوزی لینڈ کے خلاف تیسرے ون ڈے میچ میں 183 رنز کی عبرتناک شکست کا گولڈ میڈل حاصل کرکے پانچ میچز کی سیریز تھالی میں رکھ کر 3-0 سے نیوزی لینڈ کی جھولی میں ڈال چکی ہے۔۔