برطانیہ کے پلاسٹک سرجنزپروفیسر پیٹرڈیواسکی،ڈاکٹر بروس ایمرسن کا فاطمہ جناح میڈیکل یونیورسٹی اورگنگارام اسپتال کا دورہ

لاہور۔12جنوری(اُردو پوائنٹ اخبارتازہ ترین - اے پی پی۔ 12 جنوری2018ء) برطانیہ کے پلاسٹک سرجنزپروفیسر پیٹرڈیواسکی،ڈاکٹر بروس ایمرسن اور مسٹر ایس کے سین نے وائس چانسلرفاطمہ جناح میڈیکل یونیورسٹی پروفیسر خالد مسعود گوندل کی دعوت پر فاطمہ جناح میڈیکل یونیورسٹی اور سرگنگارام اسپتال کا دورہ کیا۔دورہ کا مقصد فاطمہ جناح میڈیکل یونیورسٹی میں نئی سب اسپیشلٹی بالخصوص پلاسٹک سرجری کے قیام کے سلسلے میں مشاورت اور معاونت تھی۔

وائس چانسلرایف جے ایم یوپروفیسر خالد مسعود گوندل نے فاطمہ جناح میڈیکل یونیورسٹی کے بارے میں بریفنگ میں کہا کہ یونیورسٹی بننے کے بعد میڈیکل اور سرجیکل کی نئی سب اسپیشلٹی بشمول پلاسٹک سرجری،پیڈیاٹرک سرجری،اینڈوکرنالوجی اور روماٹالوجی کا آغازکیا جارہا ہے۔

(جاری ہے)

برطانیوی وفد اورایگزیٹوڈائریکٹر جناح برن یونٹ پروفیسر معظم نذیرتارڑ نے پلاسٹک سرجری کے قیام کے لئے ہر قسم کے تعاون اور مشاورت کی یقین دہانی کروائی۔

ڈائریکٹر میڈیکل ایجوکیشن پروفیسر کامران خالد خواجہ نے بتایا کہ سرگنگارام اسپتال چھاتی کے کینسر کی سرجری کا مین سینٹر ہے۔سرجری کے بعد پلاسٹک سرجری کا شعبہ انتہائی اہم ہے۔اس شعبہ کے قیام سے برن سے متاثرہ اور پلاسٹک سرجری کے ضرورت مندمریضوں کو خاطرخواہ فائدہ ہوگا۔ایم ایس سرگنگارام اسپتال ڈاکٹر فیاض بٹ نے اس شعبہ کے قیام کو مریضوں کیلئے خوش آئند قرار دیا۔اس موقع پر پروفیسر زاہد کمال،ڈاکٹر خضرحیات گوندل،ڈاکٹرعدنان اسلم،کنٹرولر امتحانات ڈاکٹرعندلیب سمیت سینئرڈاکٹرز موجود تھے۔