ودیا بالن پہلی بار سیاستدان کا کردار نبھائیں گی

ممبئی (اُردو پوائنٹ اخبارتازہ ترین - این این آئی۔ 12 جنوری2018ء) بولی وڈ اداکارہ ودیا بالن بہت جلد ایک نہایت مشکل کردار ادا کرنے جارہی ہیں۔وہ اپنے کیریئر میں پہلی مرتبہ ایک سیاست دان کا کردار نبھانے جارہی ہیں، اور دلچسپ بات یہ ہے کہ یہ سیاست دان کوئی اور نہیں بلکہ ہندوستان کی واحد خاتون وزیر اعظم اندرا گاندھی کا کردار ہوگا۔ودیا بالن کی یہ نئی فلم لکھاری اور صحافی سگاریکا گوس کی کتاب ’اندرا: بھارت کی سب سے طاقتور وزیر اعظم‘ سے لی جارہی ہے۔

(جاری ہے)

ودیا بالن نے یہ بھی بتایا کہ ان کا اگلا پروجیکٹ فلم یا ویب سیریز ہوسکتی ہے۔اداکارہ نے اس حوالے سے مزید کہا کہ ’مجھے خوشی ہے کہ ہمیں سگاریکا کی کتاب پر فلم بنانے کے رائٹس ملے، میں ہمیشہ سے اندرا گاندھی کا کردار ادا کرنا چاہتی تھی، لیکن میں نے اب تک یہ فیصلہ نہیں کیا کہ یہ فلم ہوگی یا ویب سیریز۔سگاریکا بھی ودیا بالن کے ان کی کتاب پر فلم بنانے کے ارادے سے کافی خوش ہیں جس کا اظہار انہوں نے اپنے سوشل میڈیا اکاؤنٹ پر کیا۔خیال رہے کہ اس کتاب میں اندرا گاندھی کے سیاسی کیریئر کے بارے میں تفصیل سے بتایا گیا ہے، جبکہ ان کی ذاتی زندگی کے بھی کئی راز اس کتاب میں موجود ہیں۔