ن لیگ کا ساتھ نبھائیں گے یا نہیں، چوہدری نثار نے فیصلہ سنا دیا

ہفتہ 6 جنوری 2018 21:50

ٹیکسلا(اُردو پوائنٹ اخبارتازہ ترین - این این آئی۔ 06 جنوری2018ء) سابق وزیرداخلہ چوہدری نثار نے کہا ہے کہ میں اللہ کے سوا کسی سے نہیں ڈرتا، مخالفین ہوں یا نوازشریف سب کے منہ پر بات کرتا ہوں ،ْ اپنی جماعت کے ساتھ ہمیشہ وفاداری کی ،ْ کبھی قبضہ گروپ کا ساتھ نہیں دیا اور آئندہ بھی اپنی اس عادت کو نہیں چھوڑ سکتا۔

(جاری ہے)

ٹیکسلا میں کنونشن سے خطاب کرتے ہوئے سابق وزیرداخلہ چوہدری نثار کا کہنا تھا کہ میں نے ہمیشہ حق کی بات کی اور فخر ہے کہ حق بات کرنے والوں کے ساتھ کھڑا ہوں، میں صرف اللہ سے ڈرتا ہوں اور نوازشریف سمیت تمام سیاسی مخالفین کے منہ پر بات کرتا ہوں بلکہ ہرفورم پر سچی بات کرنے کا عادی ہوں۔

ان کا کہنا تھا کہ میں نے اپنی جماعت کے ساتھ ہمیشہ وفاداری کی لیکن کبھی کسی قبضہ گروپ کا ساتھ نہیں دیا اور آئندہ بھی اپنی اس عادت کو نہیں چھوڑ سکتا۔چوہدری نثارعلی نے کہا کہ مجھے اپنے حلقے کے عوام سے پیار ہے اور حلقے میں ہار یا جیت میرا مقدر بنے لیکن یہاں کے عوام کو کسی حالت نہیں چھوڑ سکتا، پاکستان کی تاریخ میں پہلی بار اپنے حلقے تک سوئی گیس پہنچائی، ہمارے مخالفین صرف باتیں کرتے ہیں عوام کی خدمت کرنا ان کے بس کی بات نہیں، جو لوگ بے نظیربھٹو اور پرویز مشرف کے نعرے لگاتے تھے آج وہ عمران خان کے ساتھ کھڑے ہیں۔