ملکی معیشت مستحکم ہے آئی ایم ایف میں جانے کا ارادہ نہیں، وزیر مملکت

کراچی(اُردو پوائنٹ اخبارتازہ ترین - آن لائن۔ 04 جنوری2018ء) وزیر مملکت برائے خزانہ رانا محمد افضل نے کہا ہے کہ امریکا افغانستان میں اپنی ناکامی کی ذمہ داری پاکستان پر ڈال رہا ہے، ملکی معیشت مستحکم ہے، آئی ایم ایف میں جانے کا ارادہ نہیں، 5 ماہ میں برآمدات 17 فیصد بڑھی ہیں،افغانستان میں ہمارا کوئی مفاد نہیں، مستحکم افغانستان پاکستان کے مفاد میں ہے۔

کراچی میں پریس کانفرنس کرتے ہوئے وزیر مملکت رانا افضل نے کہا کہ امریکا افغانستان میں اپنی ناکامی کی ذمہ داری پاکستان پر ڈال رہا ہے، امریکی صدر کے بیان پر دنیا پاکستان کا ساتھ دے رہی ہے۔انہوں نے کہا کہ امریکا نے جہاں 1250 ارب ڈالر دہشت گردی کی خلاف جنگ پر خرچ کیے ، کچھ اور رقم باڈر سیکیورٹی پر بھی خرچ کرے۔وزیر مملکت نے کہا کہ افغانستان میں ہمارا کوئی مفاد نہیں، مستحکم افغانستان پاکستان کے مفاد میں ہے، دراندازی روکنے کے لیے سرحد پر باڑ لگانے پر کام ہورہا ہے لہذا اس پر مذاکرات سے امریکی اعتراضات دور کریں گے۔

(جاری ہے)

ملکی معیشت پر بات کرتے ہوئے رانا افضل نے کہا کہ معیشت مستحکم ہے، صنعتی شعبہ ترقی کررہا ہے ، 5 ماہ میں برآمدات 17 فیصد بڑھی ہیں، غیر ضروری درآمدات کم کرنے پر توجہ ہے۔انہوں نے کہاکہ قرضوں کی ادائیگی معمول کے مطابق ہے، آئی ایم ایف پروگرام میں جانے کا ارادہ نہیں، البتہ ترقیاتی منصوبوں کے لیے تمام دروازے کھلے رکھے ہوئے ہیں۔ ملکی سیاسی صورتحال پر بات کرتے ہوئے وزیر مملکت رانا افضل کا کہنا تھا کہ احتساب کا مطلب یہ نہیں کہ ملکی معیشت کو ٹھپ کردیں۔انہوں نے چیئرمین پی ٹی آئی کو بھی ہلکی پھلکی تنقید کا نشانہ بناتے ہوئے کہا کہ عمران خان نے کھبی کسی اچھے کام کی تعریف نہیں کی۔۔