ایشز ٹیسٹ سیریز میں اسپاٹ فکسنگ کے بعد گرائونڈ ز کی ناقص صورتحال بھی سامنے آگئی

آئی سی سی نے چوتھے ایشز ٹیسٹ کی میزبانی کرنے والے میلبورن کرکٹ گرائونڈ کی وکٹ کو ناقص قرار دیدیا،آسٹریلین کرکٹ بورڈ کو 2 ہفتوں میں جواب جمع کروانا ہو گا

منگل 2 جنوری 2018 22:17

دبئی (اُردو پوائنٹ اخبارتازہ ترین - آن لائن۔ 02 جنوری2018ء) ایشز ٹیسٹ سیریز میں اسپاٹ فکسنگ کے بعد گرائونڈ ز کی ناقص صورتحال بھی سامنے آگئی ، آئی سی سی نے چوتھے ایشز ٹیسٹ کی میزبانی کرنے والے میلبورن کرکٹ گرائونڈ کی وکٹ کو ناقص قرار دیدیا، آسٹریلین کرکٹ بورڈ کو 2 ہفتوں میں جواب جمع کروانا ہو گا۔میچ ریفری رنگن مدوگالے نے اپنی جائزہ رپورٹ میں کہا تھا کہ پچ میں بائونس درمیانہ تھا لیکن پیس کم تھا جو میچ جاری رہنے کے ساتھ ساتھ مزید کم ہوتا چلا گیا، میچ کے پانچ دنوں میں پچ کی ہیئت میں کوئی تبدیلی نہیں ہوئی ، اس طرح کی وکٹ سے نہ تو بیٹسمینوں کو زیادہ مدد ملی نہ ہی بولرز کو مناسب مواقع ملے۔

آئی سی سی پچ اینڈ آئوٹ فیلڈ مانیٹرنگ پراسیس کے تحت یہ کسی بھی وینیو کا آخری جائزہ ہو گا، 4 جنوری سے آئی سی سی وینیوز کی مانیٹرنگ کیلیے نیا نظام متعارف کروانے والی ہے جس کے تحت غیرمعیاری وکٹوں والے وینیوز کو ڈی میرٹ پوائنٹس دیئے جائیں گے۔

(جاری ہے)

واضح رہے کہ آسٹریلیا اور انگلینڈ کے مابین ایشز سیریز کے چوتھے ٹیسٹ میچ کے پانچویں روز دونوں کپتانوں نے اتفاق رائے سے میچ ختم کرنے کا فیصلہ کیا تھا، سنچری بنانے والے سٹیو سمتھ نے بھی پچ کو تنقید کا نشانہ بنایا تھا، یہ پہلا موقع ہے کہ آسٹریلوی ٹیسٹ وینیو کی وکٹ کو ناقص قرار دیا گیا ہے۔۔