اجے دیوگن اور ارشد وارثی کامیڈین فلم میں ایک ساتھ جلوہ گرہونگے

ممبئی (اُردو پوائنٹ اخبارتازہ ترین - این این آئی۔ 01 جنوری2018ء) اجے دیوگن اور ارشد وارثی کامیڈین فلم سیریز میں ایک ساتھ نظر آئیں گے۔’ ’گول مال اگین‘‘ کی شاندار کامیابی کے بعد اجے دیوگن اب کامیڈین سیریز فلم ’دھمال‘ کی تیسری فلم میں ارشد وارثی کے ساتھ مرکزی کردار میں نظر آئیں گے۔’’دھمال‘‘ سیریز کی پہلی دونوں فلموں میں سنجے دت نے مرکزی کردار ادا کیے، تاہم اب ان کی جگہ اجے دیوگن نے لے لی ہے۔

یہی نہیں اجے دیوگن ‘ٹوٹل دھمال‘ کے شریک پروڈیوسر بھی بنیں گے۔فلم ذرائع کا کہنا ہے کہ اجے دیوگن کے فلم ساز اندرا کمار اور اشوک تھکیریا سے معاہدے طے پاگئے ہیں، جس کے بعد اب اجے دیوگن اس فلم کے شریک پروڈیوسر بھی بنیں گے۔اجے دیوگن ان ہی فلم سازوں کے ساتھ اس سے قبل بھی مشترکہ طور پر پروڈکشن منصوبے سر انجام دے چکے ہیں، تاہم ’ٹوٹل دھمال‘ میں وہ نہ صرف شریک پروڈیوسر بنیں گے، بلکہ مرکزی کاسٹ میں بھی نظر آئیں گے۔

(جاری ہے)

فلم کی ٹیم نے ’ٹوٹل دھمال‘ کی ریلیز کی حتمی تاریخ کا اعلان نہیں کیا، تاہم اسے 2019 میں جاری کیا جائے گا۔فلم کی دیگر کاسٹ میں انیل کپور اور مادھوری ڈکشٹ بھی شامل ہیں، جو گزشتہ 17 سال بعد پہلی بار ایک ساتھ کام کرتے نظر آئیں گے۔فلم کی دیگر کاسٹ میں ابھی صرف ارشد وارثی اور رتیش دیش مکھ کی تصدیق ہوسکی ہے، ابھی یہ واضح نہیں کہ فلم میں اجے دیوگن کے ساتھ کون سی اداکارہ رومانس کرتی نظر آئیں گی اضح رہے کہ فلم ’دھمال‘ 2007 میں ریلیز ہوئی تھی، جس میں ارشد وارثی، سنجے دت، جاوید جعفری، ریتیش دیشمکھ نے کام کیا تھا۔اس فلم کا دوسرا حصہ ’ڈبل دھمال‘ 2011 میں ریلیز ہوا، جبکہ ’ٹوٹل دھمال‘ اس سیریز کی تیسری فلم ہوگی۔