دہشت گردوں نے ایک مرتبہ پھرمعصوم اور نہتے لوگوں کو نشانہ بناکر ثابت کردیا ہے کہ ان کا کوئی مذہب کوئی عقیدہ نہیں، بے گناہ لوگوں، بچوں اور خواتین کو دہشت گردی کا نشانہ بنانے والے قطعی طور پر انسان کہلانے کے لائق نہیں

کوئٹہ۔ 17دسمبر(اُردو پوائنٹ اخبارتازہ ترین - اے پی پی۔ 17 دسمبر2017ء) وزیر اعلیٰ بلوچستان نواب ثناء اللہ خان زہری نے زرغون روڈ چرچ پر خودکش حملہ کے واقعے کی شدید مذمت کرتے ہوئے دھماکے میں قیمتی معصوم جانوں کے نقصان پر دِلی رنج وغم کا اظہار کیا اور واقعہ کی رپورٹ طلب کی۔ وزیر اعلیٰ نے فوری طور پر آئی جی پولیس اور کمشنر کوئٹہ سے رابطہ کر کے واقعہ کی تفصیلات سے آگاہی حاصل کی۔

وزیر اعلیٰ نے کہا کہ دہشت گردوں نے ایک مرتبہ پھرمعصوم اور نہتے لوگوں کو نشانہ بناکر ثابت کردیا ہے کہ ان کا کوئی مذہب کوئی عقیدہ نہیں، بے گناہ لوگوں، بچوں اور خواتین کو دہشت گردی کا نشانہ بنانے والے قطعی طور پر انسان کہلانے کے لائق نہیں۔ انہوں نے کہا کہ بزدل دہشت گرد آسان اور عوامی جگہوں کو بزدلی سے نشانہ بنا کر اپنے موجودگی کا احساس دلارہے ہیں جنہیں جلد منطقی انجام تک پہنچایا جائیگا۔

(جاری ہے)

وزیر اعلیٰ نے کہا کہ مسیحی برادری کو نشانہ بنانے کا مقصد انہیں اپنے مذہبی تہوار کرسمس سے روکنا اور خوف و ہراس پھیلانا ہے۔ انہوں نے کہا کہ اپنی تعلیمات تمام مذاہب کی عبادت گاہوں کے تحفظ کا درس دیتی ہے اور مسیحی برادری کا ملک اور صوبے کی تعمیر وترقی میں ہمیشہ نمایاں کردار ادا کررہا ہے۔ واقعہ میں جان بحق افراد کے لواحقین سے تعزیت اور ہمدری کا اظہار کرتے ہوئے وزیر اعلیٰ نے متعلقہ حکام کو ہدایت کی کہ زخمیوں کو بہتر طبی سہولیات کی فراہمی کو یقینی بنایاجائے۔

قانون نافذ کرنے والے اداروں کودہشت گردوں کے خلاف بروقت کاروائی کرنے پر خرج تحسین پیش کرتے ہوئے وزیر اعلیٰ نے کہا کہ ان کے دلیرانہ اور بروقت کاروائی سے بڑے نقصان سے بچاجاسکا۔ وزیر اعلیٰ نے قانون نافذ کرنے والے اداروں کو ہدایت کی کہ کوئٹہ شہر اور گردونواح کے علاقوں میں حفاظی اقدامات کو مزید سخت اور مؤثر بنایا جائے۔ نگرانی کے نظام کو بھی مزید فعال کیا جائے تاکہ دہشت گردوں کو کسی قسم کی کاروائی کا موقع نہ مل سکے۔ انہوں نے کہا کہ ہمارا مقابلہ ایسے بزدل دشمن سے ہے جو چھپ کر نہتے اور معصوم لوگوں پر وار کرتا ہے اور اس کے نزدیک انسانیت کی کوئی قدر نہیں لہذا اسیکیورٹی اداروں کو ہر دم چوکس اور مستعد رہنے کی ضرورت ہے۔