آپریشن ردالفساد،پنجاب میں کارروائی کے دوران 19دہشتگرد اور انکے سہولت کار گرفتار

ڈیرہ بگٹی میں دہشتگردوں کے ٹھکانوں سے بارودی سرنگیں اور گولا بارود برآمد

جمعرات 14 دسمبر 2017 23:02

راولپنڈی(اُردو پوائنٹ اخبارتازہ ترین - آن لائن۔ 14 دسمبر2017ء) ملک بھر میں آپریشن ردالفساد کامیابی سے جاری ہے، ایف سی بلوچستان نے ڈیرہ بگٹی میں کارروائی کرکے دہشتگردوں کے ٹھکانوں سے بارودی سرنگیں اور گولا بارود برآمد کر لیا، پنجاب کے مختلف علاقوں میں ایک کارروائی کے دوران 19دہشتگرد اور انکے سہولت کار گرفتار کر لیے گئے، پاک فوج کے شعبہ تعلقات عامہ آئی ایس پی آر کے مطابق جمعرات کے روز ایف سی بلوچستان نے خفیہ اطلاع پر ڈیرہ بگٹی میں کارروائی کی، کارروائی کے دوران دہشتگردوں کے ٹھکانوں سے بارودی مواد اور اسلحہ برآمد ہوا، دوسری جانب آپریشن ردالفساد کے تحت پنجاب رینجرز، سی ٹی ڈی، پولیس اور خفیہ اداروں نے پنجاب کے علاقوں لاہور، اٹک، سرگودھا اور دیگر علاقوں میں انٹیلی جنس بنیاد پر آپریشن کیے، آپریشن کے دوران19دہشتگرد اور ان کے سہولت کار گرفتار کر لیے گئے، دہشتگردوں کے ٹھکانوں سے بارودی مواد، ڈیٹونیٹر اور آئی ای ڈیز سمیت مختلف نوعیت کا اسلحہ برآمد ہوا، آپریشن میں غیر قانونی اسلحہ اور گولیاں بھی برآمد ہوئیں۔