پانچویں بلائنڈ کرکٹ ورلڈ کپ کے شیڈول کا اعلان

ورلڈ کپ کے میچز لاہور، گوجرانوالہ، فیصل آباد اور عجمان میں کھیلے جائیں گے

جمعرات 14 دسمبر 2017 18:12

کراچی(اُردو پوائنٹ اخبارتازہ ترین - این این آئی۔ 14 دسمبر2017ء) پانچویں بلائنڈ کرکٹ ورلڈ کپ کے شیڈول کا اعلان کردیا گیا ہے۔بلائنڈ ورلڈکپ کا افتتاحی میچ پاکستان اور بھارت کے درمیان 8 جنوری 2018 کو لاہور کے قذافی اسٹیڈیم میں کھیلا جائیگا۔ورلڈ کپ کے میچز لاہور، گوجرانوالہ، فیصل آباد اور عجمان میں کھیلے جائیں گے، ایونٹ کے دونوں سیمی فائنلز 17 اور18 جنوری کوعجمان میں ہوں گے جبکہ فائنل 21 جنوری کوقذافی اسٹیڈیم لاہور میں کھیلا جائے گا۔

دوسری جانب پاکستان بلائنڈ کرکٹ کونسل کی سیلکشن کمیٹی نے چئیرمین سیدسلطان شاہ کی منظوری سے پانچویں بلائنڈ ون ڈے کرکٹ ورلڈ کپ کیلئے پاکستان کی 17 رکنی ٹیم کے کھلاڑیوں کے ناموں کا اعلان کر رکھا ہے۔پی بی سی سی کے چئیرمین سیدسلطان شاہ نے نثارعلی کوکپتان اور عامراشفاق کو پاکستانی ٹیم کانائب کپتان مقرر کیا۔

(جاری ہے)

ٹیم آفیشلز میں عبدالرزاق کوچ، مسعودجان بیٹنگ کوچ، طاہر محمود بٹ ٹرینر اور آصف عظیم ٹیم پاکستان کے میڈیا مینیجر ہوں گے۔

7 تا21 جنوری 2018 تک پاکستان اور متحدہ عرب امارات میں ہونے والے میگاایونٹ میں شرکت کرنے والے دیگرپاکستانی ٹیم کے کھلاڑیوں میں ظفر اقبال، ساجد نواز، محمد ایاز، ریاست خان، محمد آصف، بدرمنیر، مطیع اللہ، انیس جاوید، ہارون خان، محمد جمیل، محسن خان، محمد اعجاز، ثنااللہ، اسرار حسین، محمد راشد اور پلیئنگ مینیجر ذیشان عباسی کے نام شامل ہیں۔