اہم مذہبی جماعتوں نے متحدہ مجلس عمل بحال کرنے کا فیصلہ کر لیا

کراچی (اُردو پوائنٹ اخبارتازہ ترین - آئی این پی۔ 13 دسمبر2017ء) اہم مذہبی جماعتوں نے متحدہ مجلس عمل بحال کرنے کا فیصلہ کر لیا ، فیصلے کے تحت ملک کی اہم مذہبی جماعتوں پر مشتمل اتحاد متحدہ مجلس عمل کے پلیٹ فام سے آئندہ الیکشن میں حصہ لے گا ۔ بدھ کے روز کراچی میں شاہ اویس نورانی کی صدارت میں ہونے والے اجلاس میں مولانا فضل الرحمن ، سراج الحق سمیت مذہبی جماعتوں کے اہم رہنما شریک ہوئے ۔

اجلاس میں فیصلہ کیا گیا کہ 2003 میں تشکیل پانے والے مذہبی جماعتوں کے اتحاد متحدہ مجلس عمل کو دوبارہ مکمل طور پر بحال کیا جائے گا ۔ فیصلے کے مطابق آئندہ الیکشن میں مذہبی جماعتیں متحدہ مجلس عمل کے پلیٹ فام سے حصہ لیں گی ۔ شاہ اویس نورانی کے مطابق اسٹیئرنگ کمیٹی کی سفارشات پر اتفاق کرتے ہوئے اتحادیوں کی حکومت سے علیحدگی کا فیصلہ ایک ماہ میں کیا جائے گا ۔

(جاری ہے)

ذمہ داران اور عہدیداران کا انتخاب بھی ایک ماہ میں کیا جائے گا ۔ انتخابی منشور کمیٹی فوری طور پر بنائی جائے گی ۔ متحدہ مجلس عمل فوری طور پر ملک گیر عوامی رابطہ مہم شروع کرے گی ۔ متحدہ مجلس عمل کا علماء مشائخ ونگ بھی جلد تشکیل دینے کافیصلہ کیا گیا ہے ۔ شاہ اویس نورانی نے دیگر رہنمائوں کے ہمراہ پریس کانفرنس میں کہا کہ فاٹا میں اصلاحات بل کے حوالے سے جلد مشاورت کی جائے گی ۔ دینی اور سیاسی جماعتوں سے رابطہ کیا جائے گا ۔ ملک کی مذہبی جماعتیں آئندہ الیکشن متحدہ مجلس عمل کے نام سے کتاب کے نشان پر لڑیں گی ۔ مذہبی جماعتوں کا آئندہ اجلاس خیبر پختونخوا میں منعقد کیا جائے گا ۔