پاکستان نے کلبھوشن یادیو کیس میں عالمی عدالت انصاف میں اپنا جواب جمع کرا دیا ، بھارتی موقف مسترد

بدھ 13 دسمبر 2017 21:01

اسلام آباد (اُردو پوائنٹ اخبارتازہ ترین - این این آئی۔ 13 دسمبر2017ء) پاکستان نے بھارتی جاسوس کلبھوشن یادیو کیس میں عالمی عدالت انصاف میں اپنا جواب جمع کرا دیا ہے جس کے مطابق بھارتی موقف کو مسترد کیا گیا ہے۔پاکستان کی جانب سے دفتر خارجہ کی ڈائریکٹر انڈیا افیئر فریحہ بگٹی نے عالمی عدالت انصاف میں جواب جمع کرایا جس میں موقف اختیار کیا گیا کہ کلبھوشن عام قیدی نہیں ہے اور اس پر ویانا کنونشن کا اطلاق نہیں ہوتا۔

جواب اٹارنی جنرل، لیگل ٹیم اور دفتر خارجہ کی ٹیم نے مل کر تیار کیا ہے جس میں پاکستان کے موقف کو جامع انداز میں بیان کیا گیا ہے۔واضح رہے کہ بھارت نے عالمی عدالت انصاف میں موقف اختیار کیا تھا کہ کلبھوشن یادیو کو ویانا کنونشن کے تحت قیدیوں کے حقوق حاصل نہیں ہیں جس پر آج پاکستان نے جواب جمع کراتے ہوئے کلبھوشن یادیو کی تخریبی سرگرمیوں، ٹرائل اور چارج شیٹ کی تفصیلات بھی جواب میں شامل کی گئی ہیں۔

(جاری ہے)

واضح رہے پاکستان کے پاس جواب جمع کرانے کا آج آخری دن تھا، عالمی عدالت انصاف نے پاکستان کو 13 دسمبر تک جواب جمع کرانے کا کہا تھا۔ذرائع کے مطابق پاکستان کے جواب کے بعد بھارت کو جواب الجواب جمع کرانے کا موقع دیا جائے گا اور بھارتی جواب میں اگر کوئی سوال اٹھایا گیا تو پاکستان بھی ایک اور جواب دیگا۔جوابات کا عمل مکمل ہونے کے بعد کلبھوشن کیس کی سماعت 2018 کے وسط تک شروع ہونے کا امکان ہے۔

متعلقہ عنوان :