پیپلز پارٹی کی جانب سے پیش کردہ 11تجاویزکووزیراعظم کی جانب سے مسترد کئے جانے سے متعلق خبروں کی سختی سے تردید

حکومت آئینی ، پارلیمانی اور جمہوری روایات کے مطابق اس معاملے پر پیشرفت کیلئے کاربند ہے ،ْوزیرمملکت اطلاعات

بدھ 13 دسمبر 2017 15:51

اسلام آباد (اُردو پوائنٹ اخبارتازہ ترین - این این آئی۔ 13 دسمبر2017ء) وزیر مملکت برائے اطلاعات و نشریات مریم اورنگزیب نے حلقہ بندیوں سے متعلق پاکستان پیپلز پارٹی کی جانب سے پیش کردہ 11تجاویزکووزیراعظم شاہد خاقان عباسی کی جانب سے مسترد کئے جانے سے متعلق خبروں کی سختی سے تردید کی ہے۔

(جاری ہے)

بدھ کو اپنے ایک بیان میں وزیر مملکت نے بعض اخبارات میں شائع ہونے والی خبروں کو حقائق کے برعکس قرار دیتے ہوئے کہا کہ حلقہ بندیوں پر قانون سازی ایک اہم آئینی اور جمہوری تقاضا ہے اورحکومت آئینی ، پارلیمانی اور جمہوری روایات کے مطابق اس معاملے پر پیشرفت کے لیے کاربند ہے۔

انہوں نے کہا کہ وزیراعظم شاہد خاقان عباسی کی زیر صدارت مشترکہ مفادات کونسل کا اجلاس منعقد ہوا تھا جس میں تمام صوبوں نے حلقہ بندیوں اور اس سے متعلق دیگر امور پر تفصیلی غور و غوص کے بعد متفقہ فیصلے کیے تھے۔وزیر مملکت نے کہا کہ تمام معاملات کو مشترکہ مفادات کونسل کے فیصلوں کی روشنی میں دیکھا جانا چاہیے ۔انہوں نے کہا کہ حکومت مشاورت کے جمہوری اصول پر یقین رکھتی ہے اور پارلیمان میں موجود تمام فریقین کی تجاویز کواحترام کی نظر سے دیکھتی ہے۔