پاکستان سے رابطوں جیسی کہانیاں نہ گھڑی جائیں،شتروگن کی مودی پرتنقید

مودی کہانیاں گڑھنے کی بجائے رہائش، ترقی، روزگار، صحت اور ترقی جیسے وعدوں کو پورا کریں،خطاب

منگل 12 دسمبر 2017 12:25

پاکستان سے رابطوں جیسی کہانیاں نہ گھڑی جائیں،شتروگن کی مودی پرتنقید

نئی دہلی(اُردو پوائنٹ اخبارتازہ ترین - این این آئی۔ 12 دسمبر2017ء) بالی ووڈ کے سابق ہیرو اور بی جے پی کے رکن پارلیمنٹ شتروگن سنہا نے بھارتی وزیر اعظم نریندر مودی کو تنقید کا نشانہ بناتے ہوئے کہاہے کہ پاکستان سے رابطوں جیسی کہانیاں نہ گڑھی جائیں، اس کی بجائے انتخابی وعدے پورے کریں۔نریندر مودی نے گجرات کے انتخابات پر پاکستان کے اثر انداز ہونے کا الزام لگایا تھا۔

بھارتی وزیر اعظم نریندر مودی نے کانگریس پر الزام عائد کیا تھا کہ وہ گجرات میں بے جے پی کو شکست دینے کے لیے پاکستان سے تعاون لے رہی ہے۔

(جاری ہے)

بھارتی ٹی وی کے مطابق ان کے اس الزام کی کانگریس نے تو سختی سے تردید کی ہی تھی تاہم اب ان کی اپنی پارٹی کے رکن شتروگن سنہا نے بھی مودی کو آڑے ہاتھوں لیا ہے۔سوشل میڈیا پر اپنے مختلف پیغامات میں مودی کو تنقید کا نشانہ بناتے ہوئے ان کا کہنا تھا کہ مودی جی، کہانیاں گڑھنے کی بجائے رہائش، ترقی، روزگار، صحت اور ترقی جیسے وعدوں کو پورا کریں اور ماحول کو فرقہ وارانہ رنگ نہ دیں۔

ان کا مزید کہنا تھا کہ کسی بھی طرح الیکشن جیتنے کے ہتھکنڈے کو چھوڑ دینا چاہیے۔ سیاسی مخالفین کے خلاف روز نئی غیر مصدقہ اور ناقابل یقین کہانیاں گڑھی جارہی ہیں اور اب پاکستان سے رابطوں کا الزام حیرت انگیز ہے۔