ادارے کو خود انحصاری کے راستے پر ڈال دیا ہے اور اپنے وسائل کواستعمال میں لا کر کروڑوں روپے کی بچت کی گئی ہے،میئر اسلام آباد

اسلام آباد (اُردو پوائنٹ اخبارتازہ ترین - آئی این پی۔ 10 دسمبر2017ء) میٹرو پولیٹین کارپوریشن اسلام آباد(ایم سی آئی) کی مشینری پول آرگنائزیشن(ایم پی او) کو نہ صرف اپنے پائوں پر کھڑا کر رہا ہے بلکہ اب ایم پی او اپنے وسائل سے شہر کی ضروریات پوری کر رہا ہے اور اب ہم اس پوزیشن میں آگئے ہیں کہ اپنی ضروریات کے علاوہ ایم پی او کی مشینری پرائیویٹ ادارے بھی رقم کی ادائیگی کر کے حاصل کر سکتے ہیں جس سے نہ صرف ایم سی آئی کو مالی فائدہ ہو گا بلکہ ادارے کے اپنے کام نہایت کم قیمت پر کر کے خاطر خواہ بچت بھی کی جا رہی ہے ۔

ان خیالات کا اظہار میئر اسلام آباد و چیئرمین سی ڈی اے شیخ انصر عزیز نے ایم پی او ڈائریکٹوریٹ کی جانب سے مارگلہ روڈ خیابان اقبال F-10 چوک پر جاری کارپیٹنگ کے کام کا معائنہ کرتے ہوئے کیا۔

(جاری ہے)

اس موقع پر ڈائریکٹر ایم پی او کے علا وہ دیگر افسران بھی ان کے ہمراہ تھے۔اس موقع پر میئر اسلام آباد کو بتایا گیا کہ ایم پی او کے شعبے کے فعال ہونے کے بعد شہر بھر میں ہونے والی روڈ کارپیٹنگ خودانحصاری کے تحت اپنے وسائل سے مکمل کی جا رہی ہے جس سے نہ صرف سرکاری فنڈز میں کروڑوں روپے کی بچت ہی نہیں کی گئی بلکہ کام کے اعلیٰ معیار کو بھی مدِ نظر رکھا گیا ہے۔

انہیں بتایا گیا کہ مارگلہ روڈ سیکرٹریٹ تا ایف ٹین چوک تک کارپیٹنگ مکمل کر لی گئی ہے ۔گذشتہ ایک سال کے دوران مکمل کی جانے والی شاہرائو کی کارپیٹنگ کے منصوبوں کی تفصیل بتاتے ہوئے میئر اسلام آباد کو بتایا گیا کہ اس دورانیے میں اسلا م آباد میںکل190کلومیٹر سڑکوں کی کارپٹنگ کا کام ایم پی او ڈائریکٹوریٹ نے اپنے دستیاب وسائل کو موئثر طریقے سے بروئے کار لاتے ہوئے مکمل کیا ہے جس میں شاہراہِ دستور، پیر سوہاوہ، جی ایٹ رائونڈ ابائوٹ، سیکرٹریٹ بلاکس، سیکٹر D-12 ،کنونشن سینٹر ، ڈپلومیٹک انکلیو، سروس روڈ (نارتھ ) سیکٹر E-11 ، خیابانِ سہروردی، سرینا چوک، وی آئی پی لوپ فیض آباد ، خیابانِ اقبال، مارگلہ روڈ اور پربت روڈسمیت شہر کی مختلف سڑکوں کی کارپیٹنگ مکمل کی جا چکی ہے جس سے سرکاری خزانے میں خا طر خواہ بچت بھی کی گئی۔

میئر اسلام آباد و چیئرمین سی ڈی اے شیخ انصر عزیز نے کہا ہے کہ سی ڈی اے اور میٹروپولیٹن کار پوریشن اسلام آباد کے تمام شعبوں میںدستیاب وسائل کو موئثر استعمال میں لا کرمختلف شعبوں کو خود انحصاری کے راستے پر ڈالا گیا ہے جس کے باعث سروس ڈیلوری کے معیار میں بہتری آئی ہے اور متعدد منصوبوں میں کروڑوں روپے کی بچت بھی کی گئی ہے۔ ادارے کے تمام شعبوں کو خود انحصاری اور دستیاب وسائل کے درست استعمال کو یقینی بنانے کی ہدایت کی گئی ہے تاکہ جہاں تعمیراتی کاموں میں جدید ٹیکنالوجی کو استعمال میں لایا جا سکے وہاں ادارے کو اپنے پائوں پر کھڑا کیا جا سکے کیونکہ مضبوط ادارے ترقیاتی سرگرمیوں کو فروغ دینے میں زیادہ معاون ثابت ہوتے ہیں۔

انہوں نے ایم پی او ڈائریکٹوریٹ کو ہدایت کی کہ وہ مرحلہ وار اسلام آباد کی تمام چھوٹی بڑی شاہرائوں بالخصوص زیادہ گنجان آباد اور پرانے سیکٹروں کے اندر کی سڑکوں اور سروس روڈز پر توجہ دی جائے۔