وزیراعظم پاکستان کے بجلی لوڈشیڈنگ ختم کرنے کے اعلان کا آزادکشمیر میں کوئی اثر نہیں پڑا ،ْ شیخ عقیل الرحمن

مظفرآباد میں بالخصوص سابقہ معمول کے مطابق لوڈشیڈنگ کی جارہی ہے،یوں محسوس ہوتا ہے پاکستان کی اسٹیبلشمنٹ نے آزادکشمیر کے عوام کو دونمبر شہری سمجھ رکھا ہے ،ْ بیان

جمعرات 7 دسمبر 2017 15:52

مظفر آباد(اُردو پوائنٹ اخبارتازہ ترین - این این آئی۔ 07 دسمبر2017ء) جماعت اسلامی آزادکشمیر کے نائب امیر شیخ عقیل الرحمن نے کہا ہے کہ وزیراعظم پاکستان کے بجلی لوڈشیڈنگ ختم کرنے کے اعلان کا آزادکشمیر میں کوئی اثر نہیں پڑا۔مظفرآباد میں بالخصوص سابقہ معمول کے مطابق لوڈشیڈنگ کی جارہی ہے۔ہرگھنٹے کے بعد ایک گھنٹے کی لوڈشیڈنگ کے عذاب میں عوام کو مبتلا کیا جاتا ہے ۔

یوں محسوس ہوتا ہے کہ پاکستان کی اسٹیبلشمنٹ نے آزادکشمیر کے عوام کو دونمبر شہری سمجھ رکھا ہے ۔ان خیالات کا اظہار انہوں نے اپنے ایک بیان میں کرتے ہوئے کیا۔

(جاری ہے)

انہوں نے کہا کہ جو علاقہ ہزاروں میگاواٹ بجلی پیدا کررہا ہے وہاں بدترین لوڈشیڈنگ کس جواز اور قانون کے تحت کی جارہی ہے جبکہ پاکستان سے لوڈشیڈنگ کے خاتمے کا اعلان کردیا ہے ۔آزادکشمیر کی ساری سیاسی قیادت عوامی مسائل حل کرنے کو تیار نہیں ہے ۔

انہیں اپنی مراعات سے غرض ہے جس میں 300گنا اضافہ کردیا گیا ہے جو کہ عوام کا منہ چڑا رہا ہے ۔انہوں نے کہا کہ موجودہ قیادت سے یہ توقعات وابستہ کرنا کہ وہ عوامی مسائل حل کروائے گی اور لوڈشیڈنگ کا خاتمہ کرے گی اور عوام کو علاج معالجے اور صاف پانی کی سہولیات مہیا کرے گی ،عبس ہے۔آزادخطہ میں مخلص قیادت کی ضرورت ہے۔