اے این پی کے پاس پختونون کی تعمیر و ترقی کا کوئی منشور نہیں ،شہرام خان ترکئی

صوابی (اُردو پوائنٹ اخبارتازہ ترین - این این آئی۔ 24 نومبر2017ء) سینئر صوبائی وزیر صحت شہرام خان ترکئی نے کہاہے کہ اے این پی کے پاس پختونون کی تعمیر و ترقی کا کوئی منشور نہیں سابقہ حکومتوں نے صرف اور صرف اپنے مقاصد کے لیے پختونون کو استعمال کیا اوراپنا مقصد پورا ہونے پر تنہا چھوڑ دیا مگر اب ایسے نہیں ہونے دینگے پختون کی تعلیم و تربیت کا بیڑہ پاکستان تحریک انصاف کے ہاتھ میں ہے ہم خیبر پختونخوا کی عوام کی بہتری کیلئے تعلیم و صحت پر خصوصی توجہ دے رہے ہیں ،خیبر پختونخوا کے عوام کوصرف ایک ایمان دار رہنما چاہیے تھا وہ عمران خان کی شکل میں ہمیں مل گیا ہے، یونین کونسل یعقوبی میں اے این پی کے دیرینہ رہنما مائد خان کی تحریک انصاف میں شمولیت کے موقع پر منعقدہ اجتماع سے خطاب کر تے ہوئے ان کا کہنا تھا کہ صوابی میں ستر سال سے ٹوٹے پھوٹے روڈ پختہ کئے جا رہے ہیں یوسی ادینہ سے چھوٹا لاہور تک روڑکی منظوری سے ٹریفک کے مسائل حل ہوں گے ،انہوں نے کہا کہ صحت انصاف کارڈ سے غریب مریضوں کو علاج و معالجے میں بہت مدد ملی صحت انصاف کارڈ کی وجہ سے کسی کو بھی اپنے علاج کے لیے اپنی قیمتی اشیاء فروخت کرنے کی ضرورت نہیں ہمارا مشن اور مقصد خیبر پختونخوا کی ترقی وخوشحالی ہے ،انہوں نے پشاور میں بم دھماکے کی شدید مذمت کی اورکہا کہ آج سیکورٹی فورسز کی وجہ سے خیبر پختونخوا میں امن آچکا ہے عوام آزادی سے گھوم پھر سکتے ہیں یہ سب پاکستان تحریک انصاف کا کارنامہ ہے اور ہم پاک فوج کی قربانیوں کو کبھی نہیں بھول سکتے ،اس موقع پر ایم این اے عثمان خان ترکئی نے خطاب کرتے ہوئے کہا کہ صوابی کی ترقی و خوشحالی پر کوئی سمجھوتا نہیں کریں گے صوابی ہمارا گھر ہے ہمیں اپنا گھر بنانا آتا ہے کسی کو صوابی کو دوسرا گھر کہنے کی ضرورت نہیں صوابی کی عوام اپنے لیڈر خود منتخب کرتی ہے صوابی کے عوام نے باہر سے آنے والے لیڈر کو مستردکردیا ،اجتماع سے ایم پی اے محمد علی ترکئی نے بھی خطاب کیا ۔