دشمن دہشت گردی کے ذریعے امن، خوشحالی اور ترقی کا راستہ نہیں روک سکتے، خون کے آخری قطرے تک دہشت گردوں کے خلاف لڑتے رہیں گے

وزیر مملکت برائے اطلاعات و نشریات اور قومی ورثہ مریم اورنگزیب کی پشاور کے علاقے حیات آباد میں دھماکے کی مذمت، دہشت گردی کا نشانہ بننے والوں کیلئے رنج و غم کا اظہار

جمعہ 24 نومبر 2017 11:34

دشمن دہشت گردی کے ذریعے امن، خوشحالی اور ترقی کا راستہ نہیں روک سکتے، ..

اسلام آباد ۔ (اُردو پوائنٹ اخبارتازہ ترین - اے پی پی۔ 24 نومبر2017ء) وزیر مملکت برائے اطلاعات و نشریات اور قومی ورثہ مریم اورنگزیب نے پشاور کے علاقے حیات آباد میں دھماکے کی شدید مذمت کرتے ہوئے اس افسوسناک واقعہ میں ایڈیشنل آئی جی اشرف نور سمیت دہشت گردی کا نشانہ بننے والوں کیلئے گہرے دکھ اور رنج و غم کا اظہار کیا ہے۔

(جاری ہے)

جمعہ کو ایک بیان میں مریم اورنگزیب نے کہا کہ پاکستان کی پولیس، مسلح افواج، قانون نافذ کرنے والے اداروں اور بہادر جوانوں نے جامِ شہادت نوش کرکے وطن عزیز کی بنیادیں مضبوط کی ہیں۔

انہوں نے کہا کہ ہماری قربانیاں دہشت گردی کے خلاف جنگ میں ہمارے پختہ قومی عزم کا منہ بولتا ثبوت ہیں۔ وزیر مملکت نے کہا کہ ہر پاکستانی دہشت گردی کے خلاف سینہ سپر رہے گا اور خون کے آخری قطرے تک دہشت گردوں کے خلاف لڑتے رہیں گے۔ انہوں نے کہا کہ ہمارے دشمن دہشت گردی کے ذریعے امن، خوشحالی اور ترقی کا راستہ نہیں روک سکتے۔