سی پیک منصوبہ خطے میں ترقی وخوشحالی کا ضامن ہے ، 80فیصد کام مکمل ہو چکا ہے، فروری 2018ء میں لو ڈ شیڈ نگ کا خاتمہ ہو جا ئے گا، آنیوالی نسل کو محفوظ اور روشن پاکستان دیکر جا ئینگے ،عمران خان بیرونی قوتوں کے آلہ کار بن کر ملکی ترقی کی راہ میں رخنہ ڈالنے کا کوئی موقع ہاتھ سے جانے نہیں دیتے، الیکشن مقررہ وقت پر ہو نگے

شیخوپورہ ۔ (اُردو پوائنٹ اخبارتازہ ترین - اے پی پی۔ 19 نومبر2017ء) وفاقی وزیر دفاعی پیداوار رانا تنویر حسین نے کہا ہے کہ سی پیک منصوبہ خطے میں ترقی وخوشحالی کا ضامن ہے ،یہ قومی منصوبہ جلد پایہ تکمیل کو پہنچے گا، سی پیک پر 80فیصد کام مکمل ہو چکا ہے، فروری 2018ء میں لو ڈ شیڈ نگ کا خاتمہ ہو جا ئے گا، آئندہ بر س مزید ساڑھے 3ہزار میگا واٹ بجلی کی پیداوار ہو گی، انڈسٹری کو بلا تعطل بجلی مہیا کی جارہی ہے، جس سے ملکی معیشت میں دن بدن بہتری آرہی ہے، ہم آنیوالی نسل کو محفوظ اور روشن پاکستان دیکر جا ئینگے ،کچھ عنا صرکوپاکستان کی تیز رفتار ترقی و خوشحالی ہضم نہیں ہو رہی ،عمران خان بیرونی قوتوں کے آلہ کار بن کر ملکی ترقی کی راہ میں رخنہ ڈالنے کا کوئی موقع ہاتھ سے جانے نہیں دیتے، الیکشن مقررہ وقت پر ہو نگے، کچھ لوگوں کی خواہش تھی کہ آئینی ترامیم میں مزید تا خیر ہو مگر اس کی بروقت پارلیمنٹ سے بھاری اکثریت سے منظوری سے ان کاخواب چکنا چور ہو گیا ہے ۔

(جاری ہے)

ان خیالات کا اظہار انہوں نے کو ٹ عبدالمالک نا درا آفس ، دوساکو چوک میٹل روڑ،ریسکیو1122کی افتتاحی تقریب اور ونڈالہ دیال شاہ میں ورکرز کنونشن سے خطاب کرتے ہو ئے کیا ۔پیر اشرف رسول ایم پی اے ، میڈ یا کو آرڈینٹر ندیم گورایہ ، چیئر مین ایم سی فیروزوالہ چودھری فرہاد بہادر،آرگنائزر مسلم لیگ (ن) فیروزوالہ چودھری محموداختر گورایہ ، امیدوار پی پی 165میا ں عبدالرئوف ، ملک نوید محمود چوہان ، ملک ظہیر احمد سمیت دیگر نے بھی کنونشن سے خطاب کیا ۔

قبل ازیں ذرائع ابلا غ کے نمائندوں سے گفتگو کرتے ہو ئے وفاقی وزیر رانا تنویر حسین نے کہا کہ مسلم لیگ(ن) متحد ہے ،پارٹی کے اندر کسی قسم کی کوئی دھڑا بندی نہیں، اختلاف رائے جمہوریت کا حسن ہے اسے دھڑے بندی قرار دینا مناسب بات نہیں، انہوں نے کہا کہ نو جوان قوم کے معمار ہیں ان کے ہاتھ ملک وقوم کی باگ ڈور ہے نوجوان لیگی کارکنان کو پہلے بھی پارٹی نے پارٹی ٹکٹ اور عہدے دیئے ہیں، آئندہ عام انتخابات میں بھی ان کو آگے لا یا جا ئے گا، ایک سوال کے جواب میں انہوں نے کہا نواز شریف ہمارے لیڈرہیں اور پوری پارٹی ان کی قیادت پر بھرپور اعتماد کرتی ہے، ہم نے پہلے بھی عدالت کا فیصلہ تسلیم کیا مگر قوم نے اس فیصلے کو تسلیم نہیں کیا یہی وجہ ہے کہ نواز شریف آج بھی ملک کے مقبول ترین لیڈر ہیں۔

انہوں کہا کہ مسلم لیگ (ن) آئندہ انتخابات میں بھی کا میابی حاصل کرے گی، دھرنوں ، احتجاج اور تو ڑ پھوڑ کی سیاست کرنیوالوں کو عوام نے پہلے بھی مسترد کیا تھا اور 2018ء میں بھی بدترین شکست ان کا مقدر ہو گی ،دریں اثنا وفاقی وزیر نے این اے 132کے مختلف علاقوں کے لئے واٹر فلٹریشن پلانٹ، سوئی گیس ، بجلی کی فراہمی کے علاوہ نئی رابطہ سڑکو ں کی تعمیر کا اعلان بھی کیا ۔