امریکا اورفرانس حزب اللہ ، ایران کا مقابلہ کرنے کی ضروت پر متفق

ٹرمپ کی فرانسیسی ہم منصب سے ملاقات،خطے کو عدم استحکام سے دوچارکرنیوالی قوتوں کے خلا ف ڈٹ جانے کا عزم

اتوار 19 نومبر 2017 15:00

پیرس(اُردو پوائنٹ اخبارتازہ ترین - این این آئی۔ 19 نومبر2017ء) امریکی صدر ڈونلڈ ٹرمپ نے اپنے فرانسیسی ہم منصب عمانویل ماکروں کے ساتھ بات چیت کی جو لبنان میں بحران کے حوالے سے کئی دیگر رہ نماؤں کے ساتھ مشاورت کر چکے ہیں۔غیرملکی خبررساں ادارے کے مطابق وہائٹ ہاؤس کے ایک ترجمان نے بتایاکہ ٹرمپ اور ماکروں نے حلیفوں کے ساتھ کام کرنے کی ضرورت پر اتفاق رائے کیا تا کہ حزب اللہ اور ایران کی سرگرمیوں کا مقابلہ کیا جا سکے جو خطے کو عدم استحکام سے دوچار کر رہی ہیں۔

(جاری ہے)

فرانسیسی ایوان صدارت نے بتایا کہ صدر ماکروں نے مختلف عالمی رہ نماؤں کے ساتھ ٹیلیفونک رابطہ کیا۔ ان شخصیات میں لبنانی صدر میشیل عون ، امریکی صدر ڈونلڈ ٹرمپ ، مصری صدر عبدالفتاح السیسی ، سعودی ولی عہد محمد بن سلمان اور اقوام متحدہ کے سکریٹری جنرل آنتونیو گوتریس شامل ہیں۔ماکروں نے مذکورہ رہ نماؤں کے ساتھ بات چیت میں مشرق وسطی کی صورت حال اور خطے میں امن کے قیام کے طریقوں پر تبادلہ خیال کیا۔ صدارتی محل الیزے کے مطابق فرانسیسی صدر آنے والے دنوں میں بھی دیگر بین الاقوامی قائدین کے ساتھ رابطے جاری رکھیں گے۔