دوسری تھل جیپ ریلی مظفرگڑھ ایونٹ کا دوسرا مرحلہ مکمل ہوگیا

مظفر گڑھ ۔ (اُردو پوائنٹ اخبارتازہ ترین - اے پی پی۔ 18 نومبر2017ء) دوسری تھل جیپ ریلی مظفرگڑھ ایونٹ کا دوسرا مرحلہ جبکہ ریلی کاپہلامرحلہ رائونڈمکمل ہوگیا ، جس میں سٹاک کیٹگری میں کوالیفائیڈ راونڈ پاس کرنے والی 32گاڑیوں نے حصہ لیا کوالیفائیڈ راؤنڈ میں اول پوزیشن حاصل کرنے والے ڈرائیور آصف علی چوہدری کی گاڑی نمبر502کو ڈپٹی کمشنر مظفرگڑھ محمد سیف انور نے ٹریک پر روانہ کرکے مقابلے کا افتتاح کیا، سٹاک کیٹگری کے مقابلے میں گزشتہ ریلی کے فاتح صاحبزادہ سلطان احمدکے بھائی صاحبزادہ بہادر عزیز، سپیکر قومی اسمبلی ایاز صادق کے چھوٹے بھائی سردار حسن صادق ، محمد شکیل، بابر خان ، نوشیروان ٹوانہ، منصور حلیم، سجاد قریشی، اسد اللہ مروت، سردار اللہ وسایا سمت دیگر ڈرائیورز نے حصہ لیا۔

(جاری ہے)

علاوہ ازیں سٹاک کیٹگری خواتین کا مقابلہ بھی منعقد ہوا جس میں رونی پٹیل کی بیوی تشنا پٹیل اور مومل خان نے حصہ لیا۔ مقابلہ میں شریک ڈرائیوروں نے 190کلو میٹر طویل ٹریک اوسط وقت 3گھنٹے میں طے کیا۔آصف علی نے مقرر فاصلہ 2گھنٹے 52منٹ میں طے کیا جس میں 30منٹ کا لیہ کی تحصیل چوبارہ کے مقام پر بریک کیا گیا ہے۔چوبارہ کے مقام پر عوام کی تفریح کیلئے رنگا رنگ کے پروگرامز کا بھی اہتمام کیا گیا تھا۔

سٹاک کیٹگری کے مقابلے کاباقاعدہ نتیجے کا اعلان 19نومبر کو کیا جائے گا۔ ریلی کے مقابلے کا افتتاح کرتے ہوئے ڈپٹی کمشنر محمد سیف انو رنے کہا کہ تھل جیپ ریلی کا انعقاد پنجاب حکومت کی ہدایت پر کیا گیا، جس کا مقصد ملک میں موٹر سپورٹس اور سیاحت کو ترقی دینا ہے ، ریلی کے کامیاب انعقاد پر پاکستان کا ایک سوفٹ امیچ پوری دنیا میں جائے گاجس سے مظفرگڑھ کا نام بھی روشن ہوگا۔اس موقع پر اے ڈی سی ریونیو عطاالحق ، اے ڈی سی جی ظہور احمدبھٹہ، اے سی علی پور عمران شمس، اے سی جتوئی اونگزیب سندھو، منیجنگ ڈائریکٹر ٹورزم احمرملک، جنرل منیجر اسجد غنی، فوکل پرسن فیاض احمد، ریجنل منیجر اشعر اقبال سمیت ضلعی محکموں کے افسران بھی موجود تھے۔