ایس ای سی پی کا پیراڈائزلیکس میں شامل پاکستانیوں کیخلاف ایکشن

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔13نومبر۔2017ء) ایس ای سی پی نے پیراڈائزلیکس میں شامل پاکستانیوں کے اثاثوں کی چھان بین شروع کردی ہے۔تفصیلات کے مطابق پاناما لیکس کے بعد اب پیراڈایز لیکس والے مشکل میں آگئے، ایس ای سی پی نے پیراڈائزلیکس میں شامل پاکستانیوں کیخلاف کارروائی کافیصلہ کر لیا ہے۔چیئرمین ایس ای سی پی کا کہنا ہے پیراڈائز لیکس میں نام آنےوالے پاکستانیوں کےاثاثوں کی چھان بین شروع کردی ہے، ایس ای سی پی قوانین کے مطابق کارروائی کرے گا۔

اس سے قبل پیراڈائزلیکس میں شامل پاکستانیوں کیخلاف ایف بی آر پہلے ہی تحقیقات شروع کرچکا ہے، ایف بی آرنے پیراڈائزلیکس میں 19 نام ایس ای سی پی کو بھیجے ہیں،اس سلسلے میں اسٹیٹ بینک، ایس ای سی پی اور ایف بی آرمعلومات کاتبادلہ بھی کریں گے۔

(جاری ہے)

یاد رہے کہ گورنر اسٹیٹ بینک طارق باجوہ نے کہا کہ پانامہ پپپرز کی طرح پیراڈائز پپیرز میں سامنے آنے والے افراد کے خلاف بھی کارروائی کی جائے گی۔

طارق باجوہ کا کہنا تھا کہ نامزد افراد کی تفصیلات بینکوں سے حاصل کی جائیں گی، بینک اس بات کی چھان بین کریں گے کہ یہ رقم غیر ملکی اکاﺅنٹس میں منتقل کیسے کی گئی تھی۔ یہ سرمایہ کاری کیسے عمل میں آئی اس کے بارے میں بھی تحقیقات کریں گے۔واضح رہے کہ آف شور کمپنیوں کے حوالے سے کام کرنے والی صحافتی تنظیم آئی سی آئی جے نے پیراڈائز لیکس کی دستاویزات جاری کی تھیں، جس میں 135 پاکستانیوں کے نام سامنے آئے تھے۔

مذکورہ دستاویز میں پہلا نام ٹیکس چوری کرکے آف شور کمپنی بنانے والے شوکت عزیزکا ہے، این آئی سی ایل کے سابق چیئرمین ایاز خان نیازی کا نام بھی شامل تھا۔ پیراڈائز پیپرز کے مطابق شوکت عزیز نے وزارت داخلہ کے دور میں انٹارکٹک ٹرسٹ قائم کیا تھا، ٹرسٹ کی بینیفشری شوکت عزیز کی اہلیہ بچے اور پوتی ہیں-پیپرز کے مطابق ایاز خان نیازی کی ایک کمپنی ٹرسٹ اینڈ لشین ڈسکریشنری کے نام سے ہے جبکہ باقی تین کمپنیاں انڈلشین، اسٹیبشلمنٹ لمیٹڈ، انڈلشین انٹرپرائز لمیٹڈ اور انڈلشین ہولڈنگز لمیٹڈ کے نام سے ہیں، تینوں کمپنیاں دو ہزار دس میں قائم کی گئیں،ایاز خان کے دو بھائی اور والد کے نام بطور ڈائریکٹر پیراڈائز پیپرز میں شامل ہیں۔