نوجوانوں کو روزگار کے مواقع ، تعلیم، صحت سمیت دیگر منصوبوں پر خطیر رقم خرچ کیئے ،رکن صوبائی اسمبلی میر محمد عاصم کرد گیلو

اتوار 22 اکتوبر 2017 20:31

کوئٹہ ۔ (اُردو پوائنٹ اخبارتازہ ترین - اے پی پی۔ 22 اکتوبر2017ء) رکن صوبائی اسمبلی میر محمد عاصم کرد گیلو نے کہاہے کہ عوام کی خدمت کو ہم عبادت سمجھ کر سرانجام دے رہے ہیں ،موجودہ دور اور ماضی میں عوام کے لئے کافی منصوبے بنائے اور آئندہ بھی اپنی اس طرز سیاست اور طرز خدمت کو سرانجام دیکر عوام کی مذید قربت حاصل کرتے رہیں گے اور ان کی خدمت کا سلسلہ جاری رکھیں گے۔

ماضی گواہ ہے کہ بے روزگاری کم کرنے کے لئے نوجوانوں کو روزگار کے مواقع دیئے ، تعلیم صحت ، بجلی ، مواصلات اورپینے کے صاف پانی کی فراہمی سمیت دیگر منصوبوں پر خطیر رقم خرچ کیئے عوام کے اعتماد کو بحال کرنے کی کوشش کی ۔ ان خیالات کا اظہار انہوںنے خضدار پریس کلب کے صدر عبداللہ شاہوانی سے گفتگو کرتے ہوئے کیا ۔

(جاری ہے)

صحافیوں کے وفد میںخضدار پریس کلب کے جنرل سیکریٹری منیر نور گرگناڑی ، فنانس سیکریٹری محمدخان ساسولی ، ڈپٹی جنرل سیکریٹری عبدالقادر قلندرانی اور سابق جنرل سیکریٹری خضدار عبدالواحد شاہوانی بھی شامل تھے ۔

رکن بلوچستان اسمبلی میر محمد عاصم کرد گیلو نے کہاکہ عوام نے ہمیں خدمت کے لئے منتخب کیا ہے ہم اپنی ان ذمہ داریوں سے عہدہ برا ہو کر کسی بھی مرحلے پر عوام کو تنہا نہیں چھوڑا ہمیشہ ان کے مسائل کے حل کرنے میں مگن رہے ،تعلیم اور ہیلتھ کو ترجیحات میں شامل کرکے عوام کے بنیادی مسائل کو حل کرنے میں کردار ادا کیا ۔ دستیاب وسائل کے اندررہتے ہوئے اب بھی عوام کے مسائل حل کرنے کی کوشش کررہے ہیں ۔

انہوںنے کہاکہ اجتماعی منصوبوں کو اہمیت دیکر عوام کی فلاح وبہبود کے لئے خصوصی اقدامات کررہے ہیں ۔ اب الیکشن قریب ہے انشاء اللہ اپنی کار کردگی اور خدمت کی بدولت ایک با ر پھر عوام میں جائیں گے اور ان کے ووٹوں سے منتخب ہوکر خدمت کو اسی طرح جاری و ساری رکھیں گے۔ انہوںنے کہاکہ صحافی اور سیاستدانوں کے درمیان جو سیاسی رشتہ قائم ہے وہ کبھی بھی ایک دوسرے سے جدا نہیں ہوسکتا ہے یہ سیاسی رشتہ اسی طرح قائم و دائم رہیگا۔ سیاستدان اورصحافی ملکر جو قومی خدمت سرانجام دے رہے ہیں اس کو اسی طرح تسلسل کے ساتھ جاری رکھیں گے ۔