لاہور،پی ٹی آئی رہنماعبدالعلیم خان کی غلام محی الدین سے ملاقات

لاہور (اُردو پوائنٹ اخبارتازہ ترین - آن لائن۔ 22 اکتوبر2017ء) پاکستان تحریک انصاف سنٹرل پنجاب کے صدر عبدالعلیم خان نے چیئر مین سیکرٹیریٹ میں آزا د کشمیر کے مرکزی جنرل سیکرٹری و ممبر قانون ساز اسمبلی غلام محی الدین سے ملاقات کی ، ملاقات میں پارٹی کے آئندہ کے لائحہ عمل اور ملک کی موجودہ سیاسی صورت حال پر تبادلہ خیال کیا ، عبدالعلیم خان نے کہا کہ تحریک انصاف پوری تیاری کے ساتھ آئندہ انتخابات میں سیاسی میدان میں اترے گی ، تحریک انصاف کے کارکنان اپنے چئیرمین عمران خان کا پیغام گھر گھر پہنچائیں ، پانامہ چور حکمران ٹولہ کے دن گنے جا چکے ہے ،حقیقی احتساب کے خوف سے نواز شریف اور انکے درباریوں کی رات کی نیندیں اڑ چکی ہے ، تحریک انصاف قوم کی لوٹی ہوئی دولت کی پائی پائی وصولی تک چین سے نہیں بیٹھے گی ، غلام محی الدین دیوان نے کہا کہ تحریک انصاف میں جو ق در جوق لوگ شامل ہو رہے ہے جو کہ تحریک انصاف کی بڑھتی ہوئی مقبولیت کا منہ بولتا ثبوت ہے ، آئندہ انتخابات میں تحریک انصاف بڑی کامیابی حاصل کرے گی ، چاروں صوبوں میں عوام کی طاقت سے حکومت بنائے گی ۔