لاہور میں پاک لنکا ٹی ٹوئنٹی میچ، وزارت داخلہ نے سیکیورٹی کلیئرنس دیدی،انتظامات کو حتمی شکل بھی دیدی گئی

لاہور(اُردو پوائنٹ اخبارتازہ ترین - آئی این پی۔ 22 اکتوبر2017ء) لاہور میں سری لنکا کیخلاف ٹی ٹوئنٹی میچ کیلئے وزارت داخلہ نے سیکیورٹی کلیئرنس دیدی۔وزارت داخلہ کی جانب سے پی سی بی سمیت تمام متعلقہ محکموں کو جاری کیے جانے والے خط میں لاہور میں 29اکتوبر کو شیڈول ٹی ٹوئنٹی میچ کے انعقاد کیلئے گرین سگنل دیتے ہوئے بہترین انتظامات کرنے کی ہدایت کردی گئی ہے تاہم معلوم ہوا ہے کہ میچ کو براہ راست نشر کرنے کیلئے آنے والے 17 بھارتی براڈ کاسٹرز کی سیکیورٹی کلیئرنس کیلئے بھی گرین سگنل دیا جا چکا جب کہ اس حوالے سے این اوسی (آج)پیر کو جاری کیے جانے کا امکان ہے۔

دوسری جانب کمشنر لاہور ڈویژن عبداللہ خان سنبل کی زیر صدارت اجلاس میں انتظامات کو حتمی شکل دیدی گئی، سری لنکن ٹیم کو لاہور میں صدر مملکت کے برابر پروٹوکول دیا جائے گا،ٹیموں کی سیکیورٹی کیلئے پاک فوج اور رینجرز سے مدد لی جائے گی۔

(جاری ہے)

آئی جی پنجاب عارف نواز نے دیگر اضلاع سے افسروں و اہلکاروں کو لاہور رپورٹ کرنے کے احکامات جاری کردیے۔

6 ڈی پی اوز، 30ڈی ایس پیز،الیٹ فورس کی 100 ٹیمیں بشمول 6 ریزروز اسنائپرز، 50پی سی ریزروز اور 150ریزروز پولیس اہلکاروں کو طلب کر لیا گیا ہے، تمام افسران و اہلکاروںکو27اکتوبر تک لاہور پولیس لائن رپورٹ کرنے کے احکامات جاری کردیے گئے ہیں۔تماشائیوں کو 38 اسپیڈوبس اور30 کوسٹرز پر مشتمل شٹل سروس کے ذریعے اسٹیڈیم پہنچایا جائے گا، نشتر اسپورٹس کمپلیکس میں 20اور نجی ہوٹل میں8بستروں پر مشتمل عارضی اسپتال27اکتوبر کو فعال کردیے جائیں گے، اسٹیڈیم میں سیاسی نعرے بازی پر پابندی ہوگی۔