ترکی اور روس نے شام میں امن بارے آستانہ مذاکرات کے تحت پیش رفت کو مثبت قرار دے دیا

اتوار 22 اکتوبر 2017 12:00

ماسکو ۔ (اُردو پوائنٹ اخبارتازہ ترین - اے پی پی۔ 22 اکتوبر2017ء) ترکی اور روس نے شام میں امن کے حوالے سے آستانہ مذاکرات کے تحت پیش رفت کو مثبت قرار دے دیا۔یہ بات انھوں نے ایک ٹیلی فونک گفتگو کے دوران کہی۔روسی خبر رساں ادارے کے مطابق کریملن نے اپنے بیان میں کہا ہے کہ روس کے صدر ولادیمیر پیوٹن اورترکی کے صدر رجب طیب اردوان نے گزشتہ روز ٹیلی فون پر رابطہ کر کے شام امن مذاکرات اورشام کی تازہ ترین صورتحال پر تفصیلی گفتگو کی۔

(جاری ہے)

دونوں رہنمائوں نے آستانہ عمل کے تحت رواں مہینے کے آخر میں قزاخستان کے دارالحکومت آستانہ میں منعقد ہونے والی شام امن مذاکرات کی 7ویں نشست پر بھی تبادلہ خیال کیا۔قزاخستان کے دفترخارجہ کے بیان کے مطابق آستانہ مذاکرات کا 7واں دور 30 اور31 اکتوبر کومنعقد ہوگا جس میں شامی حکومت اور حزب اختلاف کے علاوہ ایران،روس اور ترکی کے وفود بالخصوص اقوام متحدہ کے ایلچی سمیت بعض ممالک کے نمائندے بطور مبصر شریک ہوں گے۔