آئیسکو ریجن سے مزید 16بجلی چور پکڑے گئے

آئیسکو کے پانچوں سرکلز میں چیف ایگزیکٹو آئیسکو باسط زمان احمد کی ہدایات کی روشنی میں بجلی چوروں کے خلاف بلاامتیاز کاروائیاں جاری ہیں ، ترجمان

جمعہ 20 اکتوبر 2017 20:12

اسلام آباد(اُردو پوائنٹ اخبارتازہ ترین - آن لائن۔ 20 اکتوبر2017ء) آئیسکو ریجن سے مزید 16بجلی چور پکڑے گئے اسلام آباد الیکٹرک سپلائی کمپنی ( آئیسکو )کے ترجمان کے مطابق آئیسکو کے پانچوں سرکلز میں چیف ایگزیکٹو آئیسکو باسط زمان احمد کی ہدایات کی روشنی میں بجلی چوروں کے خلاف بلاامتیاز کاروائیاں جاری ہیں۔ آئیسکو چیف نے کہا ہے کہ بجلی چور نہ صرف عوام کے دشمن ہیں بلکہ اس مُلک کے بھی دشمن ہیں۔

اسی سلسلے میں آئیسکو ریجن میں مزید16بجلی چور وںکیخلاف کاروائی کی گئی ہے آئیسکو ترجمان کے مطابق اسلام آباد سرکل سے 3، اٹک سرکل سے 6 جبکہجہلم سرکل سے 7بجلی چوروں کو بجلی چوری میں ملوث پایا گیا۔ تمام بجلی چوروں کے خلاف قانونی کاروائی کیلئے متعلقہ تھانوں میںدرخواستیں جمع کروا دی گئی ہیں۔

(جاری ہے)

آئیسکو چیف باسط زمان احمد نے تمام فیلڈ افسران اور سٹاف کو ہدایات جاری کی ہیں کہ وہ زیادہ سے زیادہ وقت فیلڈ میں گزاریں اور تمام ٹیرف کے میٹروں کو مرحلہ وار چیک کریں تاکہ خراب اور سلو میٹروں کے صارفین کو جُرمانے ڈالے جائیں اور اُن کے خلاف قانونی کاروائی کی جائے ۔

آئیسکو چیف نے عہد کیا ہے کہ وہ آئیسکو ریجن سے بجلی چوری کے ناسور کو جڑ سے اکھاڑ پھینکیں گے اور آخری بجلی چور کے پکڑے جانے تک بجلی چوروں کے خلاف کاروائیاں جاری رہیں۔