پاکستان آنے سے انکار کرنے والے کھلاڑیوں کو سری لنکن بورڈ کی دھمکی
تازہ ترین : 1

پاکستان آنے سے انکار کرنے والے کھلاڑیوں کو سری لنکن بورڈ کی دھمکی

بورڈ کھلاڑیوں کو قائل کرنے کیلئے ہر ممکن کوشش کر رہے ہیں ،ْ چیف سلیکٹر گریم لبر وئے

کولمبو(اُردو پوائنٹ اخبارتازہ ترین۔ 20 اکتوبر2017ء) سری لنکن چیف سلیکٹر گریم لبروئے نے اپنے کرکٹرز کو خبردار کیا ہے کہ پاکستان کے خلاف لاہور میں ہونے والا ٹی20 میچ کھیلنے سے انکار کرنے والے کھلاڑیوں کو باقی میچوں کیلئے بھی اسکواڈ کا حصہ نہیں بنایا جائیگا۔سری لنکا اور پاکستان کے درمیان تین ٹی20 میچوں پر مشتمل سیریز کا تیسرا اور آخری میچ 29 اکتوبر کو لاہور میں شیڈول ہے اور یہ سری لنکا کا 2009 کے بعد پاکستانی سرزمین پر پہلا انٹرنیشنل میچ ہو گا۔

یاد رہے کہ مارچ 2009 میں سری لنکن ٹیم پر لاہور میں دہشت گردوں کے حملے کے بعد پاکستان پر انٹرنیشنل کرکٹ کے دروازے بند ہو گئے تھے اور اس حملے کے بعد سری لنکا پاکستان کا دورہ کرنے والی پہلی صف اول کی ٹیم ہو گی۔میچ کے پاکستان میں انعقاد کے بعد سری لنکن کپتان اپل تھارنگا نے پاکستان آنے سے انکار کردیا تھا جبکہ رپورٹس کے مطابق تجربہ کار کرکٹرز دنیش چندیمل اور لاستھ ملنگا سمیت چند دیگر کرکٹرز بھی پاکستان آنے سے انکار کر چکے ہیں۔

کھلاڑیوں کے انکار کو دیکھتے ہوئے سری لنکن چی سلیکٹرز نے سخت موقف اپناتے ہوئے کھلاڑیوں کو خبردار کیا ہے کہ پاکستان نہ آنے والے کھلاڑیوں کو بقیہ سیریز کیلئے بھی منتخب نہیں کیا جائے گا۔اپنے ایک بیان میں سری لنکن چیف سلیکٹر گریم لبروئے نے کہا کہ بورڈ کھلاڑیوں کو قائل کرنے کیلئے ہر ممکن کوشش کر رہے ہیں تاہم اس کے باوجود بھی جو کھلاڑی نہیں مانیں گے وہ گرین شرٹس کے خلاف شیڈول ٹی ٹونٹی سیریز میں ٹیم کا حصہ نہیں ہوں گے۔

انہوں نے دوٹوک الفاظ میں کہا کہ جو کھلاڑی پاکستان جانے پر رضامند ہوں گے صرف انہیں ہی پوری سیریز کیلئے منتخب کیا جائیگا۔چیف سلیکٹر نے واضح کیا کہ یہ فیصلہ سلیکٹرز کا نہیں بلکہ سری لنکن بورڈ اور وزارت کھیل کا بھی ہے اور اگر بورڈ اپنے موقف پر قائم رہا تو اس صورت میں انہیں گرین شرٹس کے خلاف سیریز کیلئے نئے کپتان کا تقرر کرنا ہو گا کیونکہ موجودہ کپتان اپل تھرنگا پہلے ہی لاہور میں کھیلنے سے انکار کر چکے ہیں۔گریم لبروئے نے کہا کہ ایک دو روز تک صورتحال واضح ہو جائے گی کہ کون کون کھلاڑی لاہور کھیلنے پر آمادہ ہیں جس کے بعد ہم اسکواڈ کا اعلان کریں گے

مزید متعلقہ خبریں پڑھئیے‎ :

وقت اشاعت : 20/10/2017 - 13:20:33

متعلقہ عنوان :

اپنی رائے کا اظہار کریں