کوئٹہ میں جام شہادت نوش کرنے والے بلوچستان کانسٹیبلری کے پانچ پولیس اہلکارنصیرآباد میں سپرد خاک

جمعرات 19 اکتوبر 2017 21:40

جعفرآباد۔19 اکتوبر(اُردو پوائنٹ اخبارتازہ ترین - اے پی پی۔ 19 اکتوبر2017ء) کوئٹہ میں جام شہادت نوش کرنے والے بلوچستان کانسٹیبلری کے پانچ پولیس اہلکارنصیرآباد میں سپرد خاک کر دیئے گئے۔ تفصیلات کے مطابق گزشتہ روزکوئٹہ کے علاقے سریاب میں خود کش حملے میں آٹھ افراد شہید ہوگئے تھے جن میں سات پولیس اہلکاروں میں پانچ پولیس اہلکاروں کاتعلق نصیرآباد ڈویژن سے ہے۔

(جاری ہے)

پولیس اہلکاروں کی میتیں ان کے آبائی علاقوں جعفرآباد، نصیرآباد ،جھل مگسی ،صحبت پور اور کچھی پہنچادی گئیں۔ جہاں ان کی آخری آرام گاہوں میں انہیں سپرد خاک کر دیاگیا۔ پولیس آفسران نے انہیں قومی پرچم اور سرکاری اعزازات کے ساتھ دفن کردیا۔ جعفرآباد کے تحصیل گنداخہ میں ایس ایس پی طارق مستوئی، اے ایس پی فہد کھوسہ، ایس ایچ او رحیم مری نے نماز جنازہ میں شرکت کی ۔ان علاقوں میں غم وسوگ کی کیفیت طاری ہے۔ شہید ہونے والوں میں منیراحمد،عبدالرزاق،عبدافتح ،شاہ زمان اور معشوق علی شامل ہیں جبکہ جھل مگسی سے تعلق رکھنے والے دو پولیس اہلکار شکور احمد اور منصور شدید زخمی ہیں۔