حکومت مہنگائی کی چکی میں پستی عوام پر بم گرانے سے باز نہیں آ رہی‘ عزیز الرحمن چن

جمعہ 13 اکتوبر 2017 14:25

لاہور (اُردو پوائنٹ اخبارتازہ ترین - این این آئی۔ 13 اکتوبر2017ء) پاکستان پیپلز پارٹی لاہور کے صدر عزیز الرحمن چن نے کہا ہے کہ حکومت مہنگائی کی چکی میں پستی عوام پر بم گرانے سے باز نہیں آ رہی ،گھریلو استعمال کی 297 درآمدی اشیا پر 15 فیصد ڈیوٹی بڑھانے کا فیصلے ظالمانہ فعل ہے،حکومت اس فیصلے کو فوری واپس لے۔ یہاں سے جاری ایک بیان میں انہوں نے کہا کہ حکومت اپنی نااہلی چھپانے کے لئے درآمدی بل کو کم کرنا چاہتی ہے لیکن اس فیصلے سے مہنگائی کا نیا طوفان آئے گا۔

(جاری ہے)

ن لیگ حکومت کی ناقص پالیسیاں عوام کے لئے وبال جان بن گئیں ہیں۔ ڈیوٹی بڑھانے کے فیصلے سے مہنگائی کا جو طوفان اٹھے گا اس سے براہ راست عوام متاثر ہوں گے۔ حکومت نے اپنا خسارہ یا نقصان پورا کرنے کے لئے درآمدی بل کم کرنے کی بجائے ایسی منصوبہ بندی کرے جس کا خمیازہ کم از کم غریب عوام کو نہ اُٹھانا پڑے۔ حکومت نے آئے روز منی بجٹ لانا اپنا وطیرہ بنا لیا ہے۔ انہوں نے کہا کہ ن لیگ کو اپنی ناقص پالیسیوں کا نتیجہ آئندہ عام انتخاب میں نظر آئے گا۔ غریب آدمی کو ریلیف ہمیشہ پیپلز پارٹی کے دور میں ملتا ہے آج عوام پیپلز پارٹی کے سنہرے دور کو یاد کر رہے ہیں۔