حکومت نے عالمی عدالت انصاف میںکلبھوشن یادیو کیس میں جسٹس (ر) تصدق حسین جیلانی کو ایڈہاک جج نامزد کر دیا

فیصلہ سے عالمی عدالت انصاف کو آگاہ کر دیا گیا ہے،ترجمان دفتر خارجہ

بدھ 11 اکتوبر 2017 21:42

اسلام آباد ۔ (اُردو پوائنٹ اخبارتازہ ترین - اے پی پی۔ 11 اکتوبر2017ء) حکومت پاکستان نے عالمی عدالت انصاف میںکلبھوشن یادیو کیس میں جسٹس (ر) تصدق حسین جیلانی کو ایڈہاک جج نامزد کر دیا۔ تصدق حسین جیلانی عالمی عدالت انصاف میں پاکستان کی نمائندگی کریں گے۔ بدھ کو دفتر خارجہ کے ترجمان کے مطابق فیصلہ سے عالمی عدالت انصاف کو آگاہ کر دیا گیا۔ جسٹس جیلانی 31 جولائی 2004ء سے 11 دسمبر 2013ء تک سپریم کورٹ کے جج اور 11 دسمبر 2013ء سے 5 جولائی 2014ء تک چیف جسٹس آف پاکستان کے عہدوں پر فائز رہے ہیں۔

(جاری ہے)

عالمی عدالت انصاف کا طریقہ کار ایک فریق کو ایسے حالات میں ایڈہاک جج کو نامزد کرنے کا اختیار دیتا ہے جب متعلقہ قومیت کا کوئی جج وہاں موجود نہ ہو۔ اس وقت عالمی عدالت انصاف میں پاکستانی قومیت کا کوئی جج نہیں جبکہ بھارت کا جج بھنڈاری عالمی عدالت انصاف میں جج کی حیثیت سے موجود ہیں۔ ایڈہاک جج کے اختیارات بھی دوسرے ججز کے برابر ہوتے ہیں۔ عالمی عدالت انصاف اب بھارت کو آگاہ کرے گا کہ حکومت پاکستان نے سابق چیف جسٹس تصدق جیلانی کو یادیو کیس میں اپنا ایڈہاک جج مقرر کیا ہے۔