ناقص مالی و اقتصادی منصوبہ بندی اورپالیسیوں کے نتیجے میں مالی سال 2017 کے دوران پاکستان کے بیرونی قرضوں اور مالیاتی خساروں میں خطرناک حد تک اضافہ ہوا ہے۔ورلڈ بینک اور آئی ایم ایف کی رپورٹ

Mian Nadeem میاں محمد ندیم پیر 9 اکتوبر 2017 14:41

ناقص مالی و اقتصادی منصوبہ بندی اورپالیسیوں کے نتیجے میں مالی سال 2017 ..
اسلام آباد (اردوپوائنٹ اخبارتازہ ترین-انٹرنیشنل پریس ایجنسی۔09 اکتوبر۔2017ء) ورلڈ بینک نے خبردار کیا ہے کہ ناقص مالی و اقتصادی منصوبہ بندی اورپالیسیوں کے نتیجے میں مالی سال 2017 کے دوران پاکستان کے بیرونی قرضوں اور مالیاتی خساروں میں خطرناک حد تک اضافہ ہوا ہے۔ورلڈ بینک اور انٹرنیشنل مانیٹری فنڈ (آئی ایم ایف) کے سالانہ اجلاس سے قبل جاری کی گئی ”دی ساوتھ ایشیا اکنامکس فوکس فال 2017 “کی رپورٹ میں کہا گیا کہ پاکستان کی کمزور اور ناقص اقتصادی پالیسیوں کے نتیجے میں اقتصادی بحران پیدا ہوا۔

مزید کہا گیا کہ آئی ایم ایف پروگرام کے اختتام کے بعد معیشت کے بیرونی اشاریوں میں تنزلی نوٹ کی گئی۔رپورٹ میں گزشہ مالی سال کو پاکستان کی معاشی ترقی کے لیے اطمینان بخش قرار دیتے ہوئے کہا گیا کہ ایک سال قبل پاکستان اقتصادی خسارہ برداشت کرنے اور بیرونی قرضوں کی ادائیگی سمیت معاشی نمو کے لیے بہتر پوزیشن میں تھا۔

(جاری ہے)

معاشی رپورٹ میں کہا گیا کہ پاکستان کی معاشی نمو دباو کا شکار رہے گی۔

واضح رہے کہ آئی ایم ایف قرض کے اختتام کے بعد پاکستان میں میکرو اکنامکس کا شعبہ جمود کا شکار ہوا، جبکہ حالیہ برسوں میں میکرو اکنامکس استحکام کی بحالی کے سلسلے میں واضح پیش رفت دیکھی گئی ہے۔پاک-چین اقتصادی راہداری (سی پیک) منصوبے اور ایم ایس سی آئی انڈیکس مارکیٹ میں شمولیت کے نتیجے میں بھی پاکستانی معیشت نے اپنی استعداد بڑھائی تاہم حالیہ مہینوں میں میکرو اکنامکس متاثرہ ہوئی ہے۔

رپورٹ کے مطابق بیرونی توازن کو بہتر بنانے سے برآمدات میں بحالی، درآمدات میں کمی اور ترسل زر کے بہاﺅ میں استحکام پیدا ہوا، تاہم مذکورہ تینوں اشاریوں میں سے کسی ایک کی بھی غیر موجودگی کے نتیجے میں کرنٹ اکاﺅنٹ خسارہ کم ہوتے ذخائر پر مزید دباﺅ بڑھائے گا۔”گروتھ آوٹ آف بلو“ کے عنوان کے تحت اس رپورٹ میں واضح کیا گیا کہ آئندہ برس الیکشن کے دوران بھی مالیاتی پوزیشن مزید متاثر ہوگی جس کے باعث قرضوں کی ادائیگی اور ان میں توازن رکھنا مشکل ہوگا۔

رپورٹ میں کہا گیا کہ ملک میں سیاسی و اقتصادی پالیسی عدم استحکام کا شکار رہی اور آئندہ برس ہونے والے عام انتخابات میکرواکنامکس پالیسوں پر بھی منفی اثرات مرتب کرسکتے ہیں، رپورٹ میں پاکستان کے معاشی نظام میں اصلاحات کی سست روی کو معاشی نمو کے لیے تنزلی قرار دیا گیا، جس کے باعث نجی مالیاتی اداروں کی عدم دلچسپی رہی۔رپورٹ میں پیش گوئی کی گئی کہ اگر پاکستان میں مثبت میکرواکنامکس پالیساں، سیاسی ماحول میں استحکام اور حکومت کی جانب سے مختصر المیعاد اصلاحات متعارف کروائی گئیں تو مالی سال 2019 میں زرمبادلہ بڑھے گا تاہم تیل کی قیمتوں میں معمولی اضافہ ہوگا۔

پاکستان میں رسد کے شعبے میں بہتری کی شرح سروسز اور صنعتی شعبوں میں ہوگی جبکہ طلب میں اضافہ پبلک اینڈ پرائیوٹ اداروں سے ہوگا، جس کے نتیجے میں سرمایہ کاری میں معتدل اضافہ ہوگا۔رپورٹ میں پیش گوئی کی گئی کہ معاشی نمو پر دباﺅ کے بادل تجارتی خسارے کے باعث مالی سال 19-2018 تک بلند سطح پر رہیں گے، اگر مثبت معاشی پالیسی اختیار نہیں کی گئی تو معاشی حالات خطرناک حد تک غیر مستحکم ہوجائیں گے۔

اس ضمن میں رپورٹ میں کہا گیا کہ ممکنہ طور پر شعبہ رسد میں نرمی کے باعث برآمدات میں بحالی کے نتیجے میں مالی سال 19-2018 میں ریلیف مل سکتا ہے۔مالی سال 2017 میں درآمدات کی شرح میں 17.7 کا مثبت اضافہ مالی سال 2018 اور 2019 پر اثر انداز ہوگا اور ترقی کی شرح میں اعتدال رہے گا۔رپورٹ میں امید ظاہر کی گی سی پیک منصوبوں میں سرمایہ کاری کے نتیجے میں ایف ڈی آئی مستحکم ہوگی، تاہم مالی بہاو¿ اور سرمائے سے مالی سال 2018 اور 2019 میں موجودہ مالیاتی خسارے کو کسی حد تک سہارا ملے گا جس کے باعث ان 2 برسوں میں زرمبادلہ سے رقم کا حصول ممکن ہوگا۔

مزید کہا گیا کہ آئندہ برس الیکشن کے دوران تجارت کے شعبے میں مالی تاخیر ممکن ہے جس کے نتیجے اگلے مالی سال میں تجارتی خسارے کا حجم بڑھ جائے گا، تجارتی خسارے کے اسباب کے حوالے سے رپورٹ میں کہا گیا کہ اگلے مالی سال میں وفاقی اور صوبائی سطح پر ٹیکس ادائیگیوں میں کمی واقع ہو گی اور اخراجات میں غیر معمولی اصافہ ہوگا۔رپورٹ میں مالی سال 2019 کے بارے میں بتایا گیا کہ الیکشن کے بعد مالی خسارہ محدود ہو جائے گام مالی سال 2017 میں مہنگائی کی شرح اعتدال میں رہی لیکن مالی سال 2018 اور 2019 میں مہنگائی میں اضافہ دیکھنے میں آئے گا۔رپورٹ میں پاکستان میں مہنگائی بڑھنے کی وجہ عالمی منڈی میں تیل کی قیمتوں اور ملکی سطح پر طلب میں اضافہ قرار دیا گیا ہے۔