یونان کے حراستی مرکز میں قید پاکستانیوں کو بدترین صورتحال کا سامنا

صفائی کے ناقص انتظامات،خوراک کی عدم فراہمی،یونانی حکام ہماری فریاد بھی نہیں سنتے،پاکستانی پھٹ پڑے

جمعہ 6 اکتوبر 2017 14:52

یونان کے حراستی مرکز میں قید پاکستانیوں کو بدترین صورتحال کا سامنا

ایتھنز(اُردو پوائنٹ اخبارتازہ ترین - این این آئی۔ 06 اکتوبر2017ء) یونانی شہر کورنتھوس کے ایک حراستی مرکزمیں قید پاکستانی شہریوں کو بدترین صورتحال کا سامنا ہے ،جرمن ریڈیو کے مطابق کیمپ میں موجود ایک پاکستانی تارک وطن عامر بٹ نے بتایاکہ اس یونانی حراستی مرکز میں کم از کم پانچ سو سے زائد غیر قانونی تارکین وطن کو قید میں رکھا گیا ہے جن میں سے زیادہ تر کا تعلق پاکستان سے ہے۔

اس بات کی تصدیق کورنتھوس میں موجود عزیر نامی ایک اور پاکستانی تارک وطن نے بھی کی۔

(جاری ہے)

عامر بٹ نے کہاکہ پاکستانی تارکین وطن حراستی مرکز میں رہائش، خوراک اور صحت کی ناکافی سہولیات کا شکارہیں ،ایک تارک وطن کا کہنا تھاکہ یونان آنے والے ہم جیسے تارکین وطن اپنے خاندان کی مدد کرنے کے لیے محنت مزدوری کی خاطر ان راستوں پر نکلتے ہیں۔ ہمارا جرم یہ ہے کہ ہم یہاں غیر قانونی طور پر آئے ہیں۔

لیکن اس جرم کی ہمیں بڑی قیمت چکانا پڑ رہی ہے اور پاکستانی تارکین وطن کو یہاں کئی مہینوں تک قید رکھا جاتا ہے۔اسی حراستی مرکز میں قید غیر قانونی طور پر یونان آنے والے ایک اور پاکستانی تارک وطن کا دعویٰ تھا کہ کیمپ کے حکام ان کی اپیلوں اور بھوک ہڑتال کے باجود انہیں بنیادی سہولیات بھی فراہم نہیں کرتے۔