معاشی آزادی کی عالمی درجہ بندی میں پاکستان کی دس درجے بہتری ، 159 ممالک کی فہرست میں درجہ 127 ہوگیا

درجہ بندی میں ہانگ کانگ ،سنگاپور بدستور پہلے اور دوسرے نمبر پر ، امریکہ اور کینیڈا گیارہویں،بھارت 95ویں نمبر پر براجمان

منگل 3 اکتوبر 2017 17:31

لاہور(اُردو پوائنٹ اخبارتازہ ترین - این این آئی۔ 03 اکتوبر2017ء) معاشی آزادی کی عالمی درجہ بندی میں پاکستان کی دس درجے بہتری ہوگئی، 159 ممالک کی فہرست میں پاکستان کا درجہ 127 ہوگیا۔پاکستانی معاشی تھینک ٹینک پرائم اور کینیڈین فریزر انسٹی ٹیوٹ کی تازہ رپورٹ کے مطابق پاکستان کی معاشی آزادی کی عالمی درجہ بندی میں 10 درجے بہتری آئی ہے جس کے بعد 159 ممالک کی فہرست میں پاکستان کا درجہ اب 127 تک پہنچ گیا جو گزشتہ سال 137 کے درجے پر تھا۔

(جاری ہے)

رپورٹ کے مطابق درجہ بندی میں ہانگ کانگ اور سنگاپور بدستور پہلے اور دوسرے نمبر پر جبکہ امریکہ اور کینیڈا گیارہویں، جرمنی تئیسویں اور بھارت 95ویں نمبر پر براجمان ہے۔رپورٹ کے مطابق پاکستان کی مختلف شعبوں میں کارکردگی بہتر رہی۔پاکستان کا حکومتی حجم کا 10 میں سے 7.88 کم ہوکر 7.86، لیگل سسٹم اور پراپرٹی رائٹس میں پاکستان کا اسکور 3.37 سے کم ہو کر 3.3 اور دولت تک رسائی کا اسکور 6.21 سے بڑھ کر 6.38 ہوگیا۔رپورٹ کے مطابق عالمی تجارت میں آزادی کا اسکور 5.82 سے کم ہو کر 5.77 اور کریڈٹ، لیبر اور بزنس میں قانون سازی میں اسکور 6.19 سے بڑھ کر 6.31 ہوگیا۔