معیار تعلیم بہتر بنانے کے لئے بلاکسی خوف اور بلا کسی پسند و نا پسند کے آزادانہ طور پر کام کیاجائے ، عمران خان کی خیبر پختونخوا کی سرکاری یونیورسٹیوں کے تمام وائس چانسلرزکو ہدایت

اسلام آباد(اُردو پوائنٹ اخبارتازہ ترین - آئی این پی۔ 26 ستمبر2017ء) پاکستان تحریک انصاف کے چیئرمین عمران خان نے خیبر پختونخوا کی سرکاری یونیورسٹیوں کے تمام وائس چانسلرزسے کہا ہے کہ وہ معیار تعلیم بہتر بنانے کے لئے بلاکسی خوف اور بلا کسی پسند و نا پسند کے آزادانہ طور پر کام کریں اور انہیں یقین دلایا ہے کہ پی ٹی آئی کی زیر قیادت حکومت خیبر پختونخوا کسی کو بھی کسی معاملے میں ان پر سیاسی اثر و رسوخ ڈالنے کی اجازت نہیں دے گی، وائس چانسلر ز کی ذمہ داری ہے کہ وہ اعلی تعلیم میں سٹیٹس کو تبدیل کرتے ہوئے تخلیقی کلچر پروان چڑھانے کیلئے متاثر کن کردار ادا کریں۔

وہ منگل کو اسلام آباد میں اعلی تعلیم سے متعلق ایک اعلی سطح اجلاس سے خطاب کر رہے تھے ۔ سپیکر خیبر پختونخوااسمبلی اسد قیصر،وزیر اعلی کے معاون خصوصی برائے اعلی تعلیم مشتاق احمد غنی،چیف سیکرٹری خیبر پختونخوااعظم خان اور سیکرٹری محکمہ اعلی تعلیم بھی اس موقع پر موجود تھے جبکہ وائس چانسلرزنے پی ٹی آئی چیئرمین کو اپنی متعلقہ یونیورسٹیوں کی صورتحال سے آگاہ کیا۔

(جاری ہے)

اس موقع پر سیکرٹری محکمہ اعلی تعلیم نے شرکا کو بریفنگ دیتے ہوئے اعلی تعلیم تک رسائی اور معیار دونوں کی بہتری کے لئے حکومتی اصلاحات اور ترقیاتی اقدامات کے بارے میں تفصیلی طور پر بتایا۔وائس چانسلرز نے یونیورسٹیوں میں میرٹ پر مبنی بھرتیوں کو سراہااور یقین دلایا کہ وہ صوبے میں تعلیم کے معیار کو ترقی یافتہ دنیاکے برابر لانے کے لئے کام کریں گے۔ اجلاس میں یہ بھی فیصلہ کیا گیا کہ محکمہ اعلی تعلیم وائس چانسلرز کانفرنسوں کا انعقاد باقاعدگی سے کرے گا تاکہ یونیورسٹیوں کے مسائل اور مشکلات پر آزادانہ طور پر بحث اور غور و خوض کے بعد اتفاق رائے سے انکا حل نکالا جاسکے۔