آئی بی چیف کی لندن میں نواز شریف سے ملاقات

پاکستان تحریک انصاف کے چیئرمین عمران خان نے آئی بی چیف سے استعفیٰ کا مطالبہ کر دیا

منگل 26 ستمبر 2017 18:43

اسلام آباد(اُردو پوائنٹ اخبارتازہ ترین - آن لائن۔ 26 ستمبر2017ء) آئی بی چیف کی لندن میں نواز شریف سے ملاقات پر پاکستان تحریک انصاف کے چیئرمین عمران خان نے آئی بی چیف سے استعفیٰ کا مطالبہ کر دیا،تفصیلات کے مطابق پی ٹی آئی کے چیئرمین عمران خان نے سماجی رابطے کی ویب سائٹ ٹوئٹر پر اپنے پیغام میں کہا ہے کہ آئی بی چیف کو ریاست کا وفادار ہونا چاہئے نواز شریف کا نہیں، آئی بی چیف بتائیں وہ 4 دن لندن میں کیا کررہے تھی کیاوہ نااہل وزیراعظم سے ملنے گئے تھی عمران خان کا کہنا تھا کہ آئی بی چیف ریاست کا نمائندہ ہے شریف خاندان کا نہیں۔

انہیں فوری طور پر استعفیٰ دے دینا چاہئے۔

(جاری ہے)

انہوں نے کہاکہ آئی بی کے سربراہ تنخواہ قومی خزانے سے وصول کرتے ہیں، انکا کیا کام ہے کہ وہ ریاست کی بجائے شریف خاندان کی چاکری کرتے پھریں، رسوائے زمانہ نااہل سابق وزیر اعظم کو سرکاری پروٹوکول شرمناک ہے، نواز شریف ٹیکس چوری، جعل سازی اور منی لانڈرنگ جیسے سنگین جرائم میں ملوث رہے ہیں، عمران خان نے کہا کہ اراکین اسمبلی کو قابو کرنے کیلئے آئی بی کے سربراہ کی نواز شریف سے معاونت پر بھی انتہائی تشویش ہے، اس سے ثابت ہوتا ہے کہ مافیا نے کیسے قانون پامال کرتے ہوئے ریاستی اداروں کا ستیاناس کردیا ہے، سرکاری اداروں کی جانب سے اسطرح کے رویے کا سماج میں انتہائی منفی پیغام جاتا ہے، طاقتور جس طرح چاہے قانون پامال کرے اسے کوئی نہیں پوچھے گا، یہ مافیا راج ہے جسے کسی طور جمہوریت قرار نہیں دیا جاسکتا۔