حارث سہیل کی ٹیسٹ ٹیم میں شمولیت پر کرکٹ حلقے حیران

بائیں ہاتھ کے بیٹس مین نے اپنا آخری فرسٹ کلاس میچ اسلام آباد میں اے ڈی بی پی کیلئے نیشنل بینک کے خلاف کھیلا تھا

اتوار 24 ستمبر 2017 14:10

حارث سہیل کی ٹیسٹ ٹیم میں شمولیت پر کرکٹ حلقے حیران
لاہور (اُردو پوائنٹ اخبارتازہ ترین - آئی این پی۔ 24 ستمبر2017ء) قومی کرکٹ ٹیم کی سلیکشن کمیٹی کی جانب سے 44 ماہ پہلے فرسٹ کلاس میچ کھیلنے والے حارث سہیل کی ٹیسٹ اسکواڈ میں شمولیت پر کرکٹ حلقے حیرانگی کا اظہار کر رہے ہیں۔پاکستان کرکٹ بورڈ کی چار ارکان پر مشتمل سلیکشن کمیٹی کے سربراہ انضمام الحق نے سری لنکا کے خلاف 28 ستمبر سے متحدہ عرب امارات میں شروع ہونے والی 2 ٹیسٹ کی سیریز کے لئے 16 ارکان پر مشتمل اسکواڈ کا اعلان کیا ہے۔

حیران کن طور پر سری لنکا کے خلاف اسکواڈ میں 28 سال کے حارث سہیل کو مڈل آرڈر بیٹس مین کی حیثیت سے موقع دیا گیا ہے۔سیالکوٹ کے بائیں ہاتھ کے بیٹس مین نے اپنا آخری فرسٹ کلاس میچ اسلام آباد میں اے ڈی بی پی کے لئے نیشنل بینک کے خلاف کھیلا تھا جہاں واحد اننگز میں وہ 16 رنز بنا کر ریٹائر ہرٹ ہو کر پویلین لوٹ گئے تھے۔

(جاری ہے)

رواں سال جون میں انگلینڈ میں کھیلی جانے والی آئی سی سی چیمپئنز ٹرافی کے لئے حارث سہیل کو ان فٹ عمر اکمل کی جگہ اسکواڈ میں شامل کیا گیا لیکن انہیں کوئی میچ کھیلنے کو نہ مل سکا۔

57 فرسٹ کلاس میچز کھیلنے والے حارث سہیل پاکستان کے لئے 22 ون ڈے اور 4 ٹی 20 کھیلنے کا تجربہ رکھتے ہیں۔کرکٹ حلقوں میں سری لنکا کے خلاف ٹیسٹ اسکواڈ میں حارث سہیل کے انتخاب پر حیرانگی کا اظہار کیا جا رہا ہے۔گذشتہ سال حارث سہیل پی سی بی سینڑل کنڑیکٹ کا حصہ تھے البتہ انہوں نے کوئی میچ نہیں کھیلا اور اس مرتبہ حارث سہیل کو سینڑل کنڑیکٹ کی " سی " کیٹگری میں رکھا گیا ہے۔

متعلقہ عنوان :