عائشہ گلالئی کے آل پاکستان مسلم لیگ میں شمولیت کیلئے رابطے، پرویز مشرف کی حمایت میں بیانات دینے کا ٹاسک بھی سونپ دیا گیا

جمعہ 22 ستمبر 2017 19:31

اسلام آباد (اُردو پوائنٹ اخبارتازہ ترین - آئی این پی۔ 22 ستمبر2017ء) تحریک انصاف کی منحرف رکن قومی اسمبلی عائشہ گلالئی کے آل پاکستان مسلم لیگ میں شمولیت کیلئے رابطے، عائشہ گلالئی کوسابق صدر پرویز مشرف کی حمایت میں بیانات دینے کا ٹاسک بھی سونپ دیا گیا،عائشہ گلالئی عنقریب مشرف کی مسلم لیگ میں شمولیت اختیار کریں گی۔ ذرائع کے مطابق تحریک انصاف کی منحرف رکن قومی اسمبلی عائشہ گلالئی کھل کرسابق صدر جنرل(ر) پرویز مشرف کی حمایت میں سامنے آ گئی ہیں۔

(جاری ہے)

عائشہ گلالئی کے آل پاکستان مسلم لیگ میں شمولیت کے حوالے سے رابطے بھی ہو رہے ہیں،گزشتہ روز ان کی جانب سے اس ضمن میں پرویز مشرف کی حمایت میں بیانات بھی سامنے آئے ہیں۔ ذرائع نے یہ بتایاکہ عائشہ گلالئی کو پرویز مشرف کی حمایت میں بیانات دینے کا ٹاسک بھی سونپا گیا ہے۔ واضح رہے کہ پیپلز پارٹی اور پرویز مشرف کے اس وقت بیانات کے حوالے سے سرد جنگ چل رہی ہے اور دونوں اطراف سے ایک دوسرے پر الزامات لگائے جا رہے ہیں، اگر ایک ایسے موقع پر عائشہ گلالئی کا پرویز مشرف کی حمایت میں بیان دینااس بات کی طرف اشارہ کرتا ہے کہ وہ جلد آل پاکستان مسلم لیگ میں شمولیت اختیار کرلیں گی۔