سابق وزیر اعظم نواز شریف کی جگہ مریم نواز لیں گی،منظور حسین وسان

سیاستدا نوں کے لیے ملک میں خطرے کی گھنٹی بجتے دیکھ رہا ہوں،وزیر صنعت و تجارت سندھ

منگل 19 ستمبر 2017 19:57

کراچی (اُردو پوائنٹ اخبارتازہ ترین - این این آئی۔ 19 ستمبر2017ء) پیپلز پارٹی سندھ کے سینئر رہنما اور صوبائی وزیر صنعت منظور حسین وسان نے پیش گوئی کی ہے کہ سابق وزیر اعظم نواز شریف کی جگہ مریم نواز لیں گی،نواز لیگ کی این اے 120 پر کامیابی پر حاصل کردہ ووٹ خوش ہونے کے لیے کافی نہیں۔ان خیالات کا اظہار انہوںنے اپنے دفتر میں میڈیا سے گفتگو کرتے ہوئے کیا۔

(جاری ہے)

انہوں نے کہا کہ شہباز شریف اور نواز شریف کی لڑائی نئی بات نہیں،شہباز شریف وزیر اعظم نواز شریف کے علاوہ کسی کو برداشت نہی کرسکتے، پارٹی کو آگے لانے کی خاطر شہباز شریف مریم نواز کو پارٹی کی قیادت ملنے پر قبول کریں گے۔ انہوں نے کہا کہ آئندہ انتخابات میں کسی ایک جماعت کی نہیں بلکہ مشترکہ حکومت بنے گی،نواز شریف کو وطن واپسی میں وقت لگے گا،کسی ایک شخص کا نہیں بلکہ نواز شریف کے بعد احتساب سب کا ہوگا۔ انہوں نے کہا کہ آئندہ انتخابات میں ن لیگ اور پی ٹی آئی کی حکومت نہیں ہوگی،سیاستدا نوں کے لیے ملک میں خطرے کی گھنٹی بجتے دیکھ رہا ہوں۔