پلاسٹک بیگز کے استعمال کو روکنے کیلئے آپریشن کیساتھ آگاہی مہم کے دور رس اثرات مرتب ہونگے‘ بیگم ذکیہ شاہنواز

تمام اضلاع میں پولیتھین بیگ کا کاروبار کرنے والوں سے بات چیت کے عمل کو مزید موثر کیا جائے ‘صوبائی وزیر تحفظ ماحول

منگل 19 ستمبر 2017 13:51

پلاسٹک بیگز کے استعمال کو روکنے کیلئے آپریشن کیساتھ آگاہی مہم کے ..

لاہور (اُردو پوائنٹ اخبارتازہ ترین - این این آئی۔ 19 ستمبر2017ء) صوبائی وزیر تحفظ ماحول بیگم ذکیہ شاہنوازنے کہا ہے کہ محکمہ تحفط ماحول کی خصوصی ٹیمیں صوبہ بھر میں آپریشن کے ساتھ ساتھ پلاسٹک بیگز کے استعمال کو روکنے کے لیے اس کے نقصانات سے متعلق آگاہی مہم کامیابی سے جاری کیے ہوئے ہیںجس کے دور رس اثرات مرتب ہونگے ۔اس امر کا اظہار صوبائی وزیر نے اپنے دفتر میں محکمانہ اجلاس سے خطاب کرتے ہوئے کیا انہوں نے کہا کہ تمام اضلاع میں پولیتھین بیگ کا کاروبار کرنے والوں سے بات چیت کے عمل کو مزید موثر کیا جائے اور دکاندار وں کو اس کی خرید کے عمل سے باز رکھنے کے لیے مثبت اقدامات کیے جائیں ۔

انہوں نے تمام ڈائریکٹرز کو تاکید کی کہ سیاہ شاپرز اور پندرہ مائیکرون سے کم موٹائی والے پلاسٹک بیگز کی تیاری خریدو فروخت پر پابندی کو ہر صورت یقینی بنائیں تاکہ شہریوں کو بیماریوں اور اس سے پیدا ہونے والے مسائل سے محفوظ رکھا جاسکے ۔

(جاری ہے)

ڈائریکٹر تحفظ ماحول نسیم الرحمن نے پولیتھین بیگز کے تدارک کے لیے پنجاب میں کیے جانے والے اقدامات سے متعلق بریفنگ دیتے ہوئے اجلاس کو بتایاکہ پولیتھین بیگ آرڈیننس میں موجودہ صورت احوال کے تناظر میں ترمیم کی ضرورت ہے اس حوالے سے پنجاب یونیورسٹی اور یونیورسٹی آف انجینرنگ اینڈ ٹیکنالوجی کے ماحولیاتی ماہرین تحقیق کر رہے ہیں۔

اجلاس میں ڈائریکٹرپلاننگ اینڈ ڈویلپمنٹ وسیم چیمہ ،ڈائریکٹر آپریشن نسیم الرحمان شاہ اور ضلعی ٹیموں کے سربراہان اور ڈپٹی ڈائریکٹرز نے شرکت کی۔