ملک میں کہیں پٹرولیم مصنوعات کی قلت نہیں، پی ایس او

ایک لاکھ 70ہزارٹن فیول کی درآمدکا عمل جاری،آئندہ چند روز میں دستیابی ممکن ہوگی ، ترجمان

پیر 18 ستمبر 2017 13:17

ملک میں کہیں پٹرولیم مصنوعات کی قلت نہیں، پی ایس او

کراچی(اُردو پوائنٹ اخبارتازہ ترین - این این آئی۔ 18 ستمبر2017ء) پاکستان اسٹیٹ آئل کمپنی نے کہا ہے کہ ملک بھرمیں کہیں بھی فیول کی قلت کا سامنا نہیں ہے۔کمپنی کے پاس پٹرولیم مصنوعات کے خاطر خواہ ذخیرہ موجود ہے اور پی ایس او کے تمام ڈپوز ملک بھر میں ایندھن کی بلاتعطل فراہمی یقینی بنانے کے لیے 24گھنٹے خدمات انجام دے رہے ہیں۔کمپنی کے تحت ایندھن کی درآمد اور مقامی ریفائنریز سے خریداری کا عمل بلاتعطل جاری ہے۔

ایک لاکھ 70ہزار میٹرک ٹن پٹرولیم مصنوعات کی درآمد زیر عمل ہے جس میں سے زیادہ تر مقدار آئندہ چند روز میں دستیاب ہوگی۔ اس بنیاد پر ہم اپنے صارفین کو اس بات کی یقین دہانی کراتے ہیں کہ انہیں ملک بھر میںکہیں بھی پی ایس او کے آٹ لیٹس پر ایندھن کی قلت کا سامنا نہیں کرنا پڑے گا۔

(جاری ہے)

پاکستان اسٹیٹ آئل کمپنی سرمائے کی دستیابی کے حوالے سے درپیش تمام تر مشکلات کے باوجود اپنے مارکیٹ شیئر سے زیادہ مصنوعات سپلائی کررہی ہے تاکہ ملک گیر سطح پر پٹرولیم مصنوعات کی بلاتعطل فراہمی کو یقینی بنایا جاسکے۔

اس وقت پی ایس او کے پاور سیکٹر سمیت پی آئی اے اور سوئی ناردرن گیس پائپ لائن لمیٹڈ (ایس این جی پی ایل)اور قیمتوں کے فرق کے کلیم کی مد میں حکومت پر مجموعی واجبات کی مالیت 293.6 ارب روپے تک پہنچ چکی ہے۔ ان واجبات کی وصولی کے لیے پی ایس او کی انتظامیہ وفاقی وزارت توانائی، وزارت خزانہ، پی آئی اے اور ایس این جی پی ایل کے ساتھ مسلسل رابطے میں مصروف ہے۔