بھارت نے کلبھوشن مقدمے پرعالمی عدالت میں جواب جمع کرادیا
تازہ ترین : 1
بھارت نے کلبھوشن مقدمے پرعالمی عدالت میں جواب جمع کرادیا

بھارت نے کلبھوشن مقدمے پرعالمی عدالت میں جواب جمع کرادیا

کلبھوشن یادیو سے متعلق پاکستان کی جانب سے ویانا کنونشن کی خلاف ورزی پر اپنا جواب تحریری طور پر جمع کرادیا ،بھارتی ترجمان

نئی دہلی(اُردو پوائنٹ اخبارتازہ ترین۔ 14 ستمبر2017ء)بھارت کی وزارت خارجہ نے عالمی عدالت انصاف (آئی سی جی) میں 2016 میں پاکستان میں گرفتار ہونے جاسوس کلبھوشن یادیو کے مقدمے کے حوالے سے بھارت کی جانب سے تحریری بیان جمع کرانے کی تصدیق کردی ہے۔بھارتی ٹی وی کے مطابق بھارت نے کلبھوشن یادیو کو پاکستان میں فیلڈ جنرل کورٹ مارشل کے ذریعے سزائے موت سنائے جانے کے بعد معاملے کو پاکستان کے خلاف رواں سال مئی میں آئی سی جے میں داخل کیا تھا۔

آئی سی جے میں دائر درخواست میں بھارت نے موقف اپنایا تھا کہ پاکستان، بھارت کو کلبھوشن یادیو تک سفارتی رسائی دینے سے انکار کرکے ویاناکنونشن کی خلاف ورزی کررہا ہے اس لیے عالمی عدالت کلبھوشن کی سزائے موت کو معطل کرنے کو یقینی بنائے۔درخواست میں کہا گیا تھا کہ 'کلبھوشن کی گرفتاری کے بعد ایک لمبے عرصے تک معلومات نہیں دی گئیں' اور میڈیا کے ذریعے ہی ان کی سزائے موت کا علم ہوا۔

آئی سی جے نے 15 مئی کو سماعت کے دوران سزا کو روکنے کا حکم دیتے ہوئے کہا تھا کہ پاکستان عدالت کے حتمی فیصلے تک کلبھوشن کو سزائے موت نہ دینے کے لیے اقدامات اٹھانے کو یقینی بنائے۔عالمی عدالت نے بھارت اور پاکستان کو بالترتیب 13 ستمبر اور 13 دسمبر تک اپنے جواب دائر کرنے کا حکم دیا تھا جس کے بعد عدالتی سماعت آگے بڑھے گی اور حتمی فیصلے تک پہنچا جائے گا۔

بھارتی وزارت خارجہ کے ترجمان نے بھارت کی جانب سے اٹھائے گئے تازہ اقدام کے بارے میں ایک سوال کا جواب دیتے ہوئے کہا کہ بھارت نے کلبھوشن یادیو سے متعلق معاملے میں پاکستان کی جانب سے سفارتی تعلقات 1963 کے ویانا کنونشن کی خلاف ورزی پر اپنا جواب تحریری طور پر جمع کرادیا ہے۔ان کا کہنا تھا کہ یہ 8 مئی 2017 کو عدالت میں دائر کی گئی درخواست کا تسلسل ہے۔

مزید متعلقہ خبریں پڑھئیے‎ :

وقت اشاعت : 14/09/2017 - 12:25:12

متعلقہ عنوان :

اپنی رائے کا اظہار کریں