اگست 2017ء میں سیمنٹ کی مقامی کھپت میں 10.85 فیصد اضافہ ہوا

کراچی ۔ (اُردو پوائنٹ اخبارتازہ ترین - اے پی پی۔ 13 ستمبر2017ء) سیمنٹ کی مقامی کھپت میں اضافے کا رجحان اگست 2017ء میں بھی جاری رہا اور مقامی فروخت میں گزشتہ برس اگست کے مقابلے میں 10.85 فیصد اضافہ ہوا تاہم اس دوران برآمدات میں 26.47 فیصد کمی واقع ہوئی اس طرح مجموعی فروخت میں اضافہ 5.05 فیصد رہا۔اگست 2017ء کے اعداد و شمار کے مطابق سیمنٹ کی فروخت 3.766 ملین ٹن رہی جو گزشتہ برس اگست 2016ء میں 3.585ملین ٹن تھی۔

اگست 2017ء میں شمالی علاقے میں سیمنٹ کی مقامی کھپت 2.731 ملین ٹن تھی جو گزشتہ برس اگست 2016ء کو 2.495ملین ٹن تھی۔ملک کے جنوبی علاقوں میں قائم سیمنٹ کے کارخانوں کی مقامی فروخت اگست 2017ء میں 0.625ملین ٹن تھی جو گزشتہ برس اگست میں0.532 ملین ٹن تھی۔شمالی علاقے کی برآمدات اس دوران 0.307 ملین ٹن رہیں جو گزشتہ برس اگست 2016ء میں0.355 ملین ٹن تھیں۔

(جاری ہے)

جنوبی علاقے میںقائم سیمنٹ کے کارخانوں کی برآمدات اس دوران0.103ملین ٹن رہیں جو گزشتہ برس اگست میں 0.203ملین ٹن تھیں۔

آل پاکستان سیمنٹ مینوفیکچررز ایسوسی ایشن کے ترجمان کے مطابق اگست 2017ء میں سیمنٹ کی پیداواری صلاحیت 96 فیصد سے زائد استعمال کی گئی جس کی وجہ مقامی طلب میں اضافہ ہے جو ایک اچھا رجحان ہے اوراس کا مطلب ہے کہ معیشت بہتر ہے۔رواں برس کے ابتدائی دو ماہ سیمنٹ کی فروخت 7.148ملین ٹن رہی جو گزشتہ برس اس عرصے کے مقابلے میں 20.81 فیصد زیادہ ہے۔اس دوران مقامی کھپت میں 27.95 فیصد اضافہ ہوا تاہم ، برآمدات میں 13.39 فیصد کمی واقع ہوئی۔

یہ بات بھی قابل ذکر ہے کہ جولائی۔اگست کے دوران سیمنٹ کی مقامی کھپت شمالی علاقے میں 28.51 فیصد بڑھ گئیں جبکہ ملک کے جنوبی علاقے میں یہ اضافہ 25.41 فیصد ریکارڈ کیا گیا۔شمالی علاقے کی برآمدات میں اس دوران 2.47فیصد کمی واقع ہوئی جبکہ جنوبی علاقے میں برآمدات کی یہ کمی 25.41فیصد تھی۔برآمدات میں یہ کمی اداروں کے لیے باعث تشویش ہونا چاہیے کیونکہ ماضی میں جنوبی علاقے میں قائم سیمنٹ کے کارخانے سمندر سے قریب ہونے کی وجہ سے زیادہ مقدار میں سیمنٹ برآمد کیا کرتے تھے۔

تاہم برآمدات میں مسلسل کمی تشویش کا باعث ہے اور یہ کمی غیر ٹیکسٹائل مصنوعات کی مجموعی برآمدات میں کمی کے مطابق ہے اور یہ ہمارے مینوفیکچررزکی خراب مسابقتی صلاحیت کو ظاہر کرتی ہے۔اس صورت حال کا تقاضہ ہے کہ حکومت اپنی پالیسیوں پر نظرثانی کرے جس میں ریگولیشن اور ٹیکسیشن کی پالیسیاں ہیںاور یہ سب غیر ٹیکسٹائل مصنوعات کے بارے میں ہیں۔

اس جائزے سے مقامی مینوفیکچرنگ سیکٹر کو فائدہ پہنچے گا اور برآمدات میں بہتری واقع ہوگی اور معیشت کو فائدہ پہنچے گا۔افغانستان کو سیمنٹ کی برآمدات جولائی ۔ اگست 2017ء میں 21.41 فیصد اضافہ ہوا ۔ یہ اضافہ بھارت اور دیگر ملکوں کو برآمدات کی کمی کے مقابلے میں انتہائی معمولی ہے۔جولائی تا اگست 2017ء میں بھارت کو سیمنٹ کی برآمدات میں کمی 21.76 فیصد اور دیگر ملکوں کو 37.53 فیصدکم کی گئیں۔