پاکستان میں کرکٹ کی واپسی،آئی سی سی چیئر مین ششانک منوہر کا خیر مقدم

پیر 11 ستمبر 2017 20:54

دبئی(اُردو پوائنٹ اخبارتازہ ترین - آئی این پی۔ 11 ستمبر2017ء) آٹھ سال کے صبر آزما انتظار کے بعد پاکستان میں انٹرنیشنل کرکٹ کی واپسی ہو چکی ہے۔ زندہ دلان کے شہر میں آزادی کپ کا میلہ سج گیا ہے۔ آئی سی سی چئیرمین ششانک منوہر نے اس موقع پر پی سی بی کے نام اپنے پیغام میں کہا ہے کہ وہ پاکستان اور ورلڈ الیون کے لیے نیک خواہشات رکھتے ہیں۔ امید ہے کہ دلچسپ سیریز سے پاکستانی شائقین لطف اندوز ہونگے۔

(جاری ہے)

دوسری جانب ورلڈ الیون کے مڈل آرڈر بیٹسمین جارج بیلی کا کہنا تھا کہ پاکستان میں پہلی بار کرکٹ کھیلنے کا موقع مل رہا ہے۔ پاکستانی ٹیم کے ساتھ سنسنی خیز مقابلے ہونگے۔ ادھر ڈیوڈ ملر بھی گرین شرٹس کے خلاف کھیلنے کے لیے بے تاب ہیں۔ کہتے ہیں کہ سرفراز الیون کو ہرانا آسان نہیں ہو گا۔ انگلینڈ کے ٹی ٹونٹی فاتح کپتان پال کولنگ ووڈ نے بھی پاکستان آمد پر خوشی کا اظہار کیا ہے۔